អ្នកនាំពាក្យក្រសួងការបរទេសចិន លោក ហ្គ័រ ចាឃុន (Guo Jiakun) បាននិយាយកាលពីថ្ងៃពុធសប្ដាហ៍នេះថា ចិនប្រឆាំងដាច់ខាតរាល់សកម្មភាពបង្កហេតុដោយប្រទេសណាមួយ ក្រោមលេសសេរីភាពនៃការធ្វើនាវាចរណ៍។

យោធាប្រទេសចិន កាលពីថ្ងៃពុធ ១២ កុម្ភៈសប្ដាហ៍នេះ បានរិះគន់ខ្លាំងៗលើសហរដ្ឋអាមេរិក ថាកំពុងបង្កើនហានិភ័យសន្តិសុខនៅច្រកសមុទ្រតៃវ៉ាន់ បន្ទាប់ពីនាវាកងទ័ពជើងទឹកអាមេរិកពីរគ្រឿងបានធ្វើដំណើរឆ្លងកាត់ច្រកសមុទ្រដ៏រសើបក្នុងសប្តាហ៍នេះជាលើកដំបូង ចាប់តាំងពីលោកប្រធានាធិបតី Donald Trump ចូលកាន់តំណែងកាលពីខែមុនមក។

លោកបានធ្វើអត្ថាធិប្បាយបែបនេះ នៅឯសន្និសីទសារព័ត៌មានប្រចាំថ្ងៃមួយឆ្លើយតបទៅនឹងវត្តមាននាវាចម្បាំងរបស់អាមេរិកក្នុងច្រកសមុទ្រតៃវ៉ាន់នៅសប្ដាហ៍នេះ ដោយនិយាយថា កងទ័ពរំដោះប្រជាជនចិន បានចេញការឆ្លើយតបរួចហើយ។  

លោកបានបញ្ជាក់ថា កោះតៃវ៉ាន់គឺជាផ្នែកមួយមិនអាចកាត់ផ្ដាច់បាននៃដែនដីរបស់ចិន ហើយបញ្ហាកោះតៃវ៉ាន់ មិនមែនជាសេរីភាពនៃការធ្វើនាវាចរណ៍ តែជាអធិបតេយ្យភាព និងបូរណភាពទឹកដីរបស់ប្រទេសចិន។ 

ទង្វើរបស់អាមេរិក គឺជាការប៉ុនប៉ង បង្ករឿង និងគំរាមកំហែងដល់អធិបតេយ្យភាព និងសន្តិសុខរបស់ចិន ក្រោយលេសសេរីភាពនៃការធ្វើនាវាចរណ៍ដែលចិនតែងតែប្រឆាំងរហូតមក៕