.អ្នករាយការណ៍ពិសេសរបស់អង្គការសហប្រជាជាតិ ទទួលបន្ទុកឯករាជ្យភាពនៃចៅក្រម និងមេធាវីបាននិយាយកាលពីថ្ងៃពុធ ទី១២ ខែកុម្ភៈថា ការសម្រេចចិត្តរបស់សហរដ្ឋអាមេរិក ក្នុងការដាក់ទណ្ឌកម្មលើតុលាការព្រហ្មទណ្ឌអន្តរជាតិ (ICC) គឺជា «ចំណាត់ការដ៏គួរឱ្យភ្ញាក់ផ្អើល»។

រដ្ឋអាជ្ញាតុលាការព្រហ្មទណ្ឌអន្តរជាតិ លោក Karim Khan គឺជាមនុស្សដំបូងគេជាអ្នកទទួលរងទណ្ឌកម្មសេដ្ឋកិច្ច និងការធ្វើដំណើរ ដាក់ដោយប្រធានាធិបតីសហរដ្ឋអាមេរិក លោក Donald Trump ដែលកំណត់គោលដៅលើតុលាការឧក្រិដ្ឋកម្មសង្គ្រាមជុំវិញការស៊ើបអង្កេតលើពលរដ្ឋអាមេរិក ឬសម្ព័ន្ធមិត្តរបស់សហរដ្ឋអាមេរិក។

ទណ្ឌកម្មនេះ ជាចំណាត់ការដដែល ដែលលោក Trump បានដាក់ក្នុងអំឡុងអាណត្តិដំបូងរបស់លោក រួមទាំងការបង្កកទ្រព្យសម្បត្តិនៅសហរដ្ឋអាមេរិកលើអ្នកទាំងឡាយដែលត្រូវបានកំណត់គោលដៅ និងបានរារាំងពួកគេ និងក្រុមគ្រួសារ មិនឱ្យធ្វើដំណើរទៅសហរដ្ឋអាមេរិក។

អ្នករាយការណ៍ពិសេសរបស់អង្គការសហប្រជាជាតិ លោកស្រី Margaret Satterthwaite បានប្រាប់សារព័ត៌មានរ៉យទ័រថា «វាជាចំណាត់ការដ៏គួរឱ្យភ្ញាក់ផ្អើលចំពោះនីតិរដ្ឋអន្តរជាតិ និងការវាយដោយផ្ទាល់ចំមុខតុលាការ ជាសហគមន៍អន្តរជាតិតែមួយគត់ ដែលអាចនាំយកអ្នកទទួលខុសត្រូវចំពោះឧក្រិដ្ឋកម្មធ្ងន់ធ្ងរ មកកាត់ទោស។