​បាល់ទាត់៖ ​ក្រុម​អង់គ្លេស​បាន​បំបាក់​ក្រុម​ម្ចាស់ផ្ទះ​សាន់​ម៉ា​រី​ណូ​ធ្ងន់​ករ ១០-០ ដើម្បី​កក់​កៅអី​ស្វ័យប្រវត្តិ​ទៅកាន់​ការប្រកួត​បាល់ទាត់​ពិភពលោក FIFA World Cup ២០២២ នៅ​កាតា​។ ​​នេះ​ជា​ជ័យជំនះ​ធំ​បំផុត រឺ​ជា​ជ័យជំនះ​ដែលមាន​គ្រាប់​បាល់ ២ខ្ទង់​លើកដំបូង​រាប់​ពី​ឆ្នាំ១៩៦៤​។

​​ខ្សែការពារ Manchester United, Harry Maguire ជា​អ្នក​រកបាន​គ្រាប់​នាំមុខ​មុនគេ​ ខណៈ​គ្រាប់​បាល់​ផ្សេងទៀត​រកបាន​ដោយ​កីឡាករ​របស់ Arsenal, Smith Rowe ដែល​ជាប់​ជំរើសជាតិ​អង់គ្លេស​លើកដំបូង​ក៏ដូចជា Tyron Mings, Tammy Abraham និង Bukayo Saka​។​ ​​ខ្សែប្រយុទ្ធ Tottenham Hotspur, Harry Kane រកបាន ៤គ្រាប់​ម្នាក់​ក្នុងចំណោម ១០គ្រាប់​នេះហើយ ៤​គ្រាប់​នេះ​កើតឡើង​នៅក្នុង​វគ្គ​ទី១ ទាំងអស់​បូករួម​ទាំង​បាល់ ១១ម៉ែត្រ​ពីរ​គ្រាប់​។ ​​បួន​គ្រាប់​នេះ​បានធ្វើឱ្យ Harry Kane ស៊ុត​បញ្ចូល​ទី​ឱ្យ​អង់គ្លេស​សរុប​បាន ៤៨គ្រាប់​ស្មើនឹង​លោក Gary Lineker និង​ដេញ​ពីក្រោយ Sir Bobby Charlton និង Wayne Rooney ដែលមាន​សរុប ៥៣គ្រាប់​។

​​Harry Kane ក៏បាន​ក្លាយជា​កីឡា​ករទី៤ ដែរ​ដែល​រកបាន Hat-Trick ពីរ​ប្រកួត​ជាប់​គ្នា​ឱ្យ​អង់គ្លេស​បន្ទាប់ពី Vivian Woodward, Dixie Dean និង Tommy Taylor និង​ជា​លើកដំបូង​ដែល​រកបាន ៤គ្រាប់​បន្ទាប់ពី Ian Wright ធ្លាប់​ស៊ុត​បាន ៤គ្រាប់​ដែរ​នៅពេល​អង់គ្លេស​ឈ្នះ​សាន់​ម៉ា​រី​ណូ​ដូចគ្នា​កាលពី​ឆ្នាំ១៩៩៣៕

​អត្ថបទ​៖​នាង សុភា​វុ​ធ