កូរ៉េខាងត្បូងបាននិយាយនៅថ្ងៃព្រហស្បតិ៍ (១៣ កុម្ភៈ) នេះថា កូរ៉េខាងជើង កំពុងរុះរើទីតាំងមួយនៅឯរមណីយដ្ឋានភ្នំ Kumgang របស់ខ្លួន ដែលប្រើសម្រាប់រៀបចំកិច្ចប្រជុំរវាងគ្រួសារដែលបែកគ្នាក្រោយសង្គ្រាមកូរ៉េ ជាសញ្ញាចុងក្រោយនៃភាពតានតឹងរវាងកូរ៉េទាំងពីរ។

ក្រសួងបង្រួបបង្រួមរបស់ទីក្រុងសេអ៊ូល ដែលចាត់ចែងកិច្ចការរវាងកូរ៉េទាំងពីរ បានជំរុញក្នុងសេចក្តីថ្លែងការណ៍មួយ ឱ្យកូរ៉េខាងជើងបញ្ឈប់ជាបន្ទាន់នូវសកម្មភាពនៅទីតាំងក្បែរព្រំដែននោះ។

ក្រសួងបាននិយាយថា ការរុះរើអគារនេះគឺជា "ទង្វើប្រឆាំងមនុស្សធម៌ ដែលជាន់ឈ្លីបំណងប្រាថ្នារបស់គ្រួសារដែលបែកគ្នា" ដោយបន្ថែមថា ខ្លួននឹងពិចារណាវិធានការផ្លូវច្បាប់លើសកម្មភាពនេះ និងការឆ្លើយតបរួមគ្នាជាមួយសហគមន៍អន្តរជាតិ។

កូរ៉េខាងជើង បាននិងកំពុងបង្កើនវោហារសាស្ត្រប្រឆាំងនឹងប្រទេសជិតខាងកូរ៉េខាងត្បូងរបស់ខ្លួន ក្នុងប៉ុន្មានឆ្នាំចុងក្រោយនេះ ដោយចាត់ទុកកូរ៉េខាងត្បូងថាជា "រដ្ឋអរិភាព"។ ទីក្រុងព្យុងយ៉ាង ក៏បានបំផ្ទុះផ្នែកនៃផ្លូវអន្តរកូរ៉េ និងផ្លូវរថភ្លើងនៅខាងព្រំដែនរបស់ខ្លួនកាលពីឆ្នាំមុន ដែលបានជំរុញឱ្យយោធាកូរ៉េខាងត្បូង បាញ់ព្រមាននៅពេលនោះ៕