ប្រធានាធិបតីអាមេរិក លោក Donald Trump កាលពីថ្ងៃពុធ (ទី១២ ខែកុម្ភៈ) បាននិយាយថា លោកមិនគិតថា វាជារឿងសមហេតុផល ដែលអ៊ុយក្រែនត្រូវចូលរួមជាមួយអង្គការសន្ធិសញ្ញាអាត្លង់ទិកខាងជើង ឬអង្គការណាតូ (NATO) ហើយថា វាមិនអាចទៅរួចនោះទេ ដែលអ៊ុយក្រែននឹងដណ្ដើមបានដែនដីទាំងអស់របស់ខ្លួនមកវិញ។

គួរបញ្ជាក់ថា លោក Trump បានពិភាក្សាអំពីសង្គ្រាម នៅអ៊ុយក្រែន កាលពីថ្ងៃពុធ អំឡុងការសន្ទនាតាមទូរសព្ទ ជាមួយប្រធានាធិបតីរុស្ស៊ី លោក Vladimir Putin និងប្រធានាធិបតីអ៊ុយក្រែន លោក Volodymyr Zelenskiy ជាការបោះជំហានដ៏ធំដំបូងរបស់ប្រធានាធិបតីសហរដ្ឋអាមេរិកឆ្ពោះទៅរកកិច្ចប្រឹងប្រែងការទូត នៅក្នុងជម្លោះដែលលោកបានសន្យាថា នឹងបញ្ចប់ឲ្យបាន។

លោក Trump បាននិយាយថា រូបលោកផ្ទាល់ និងលោក Putin រំពឹងនឹងជួបគ្នា នាពេលខាងមុខ ដោយប្រហែលជានៅប្រទេសអារ៉ាប៊ីសាអ៊ូឌីត។ ហើយអំឡុងពេលថ្លែងទៅកាន់អ្នកសារព័ត៌មាន នារសៀលថ្ងៃពុធនោះ លោក Trump បានពណ៌នាការជជែកតាមទូរសព្ទរបស់លោក ជាមួយលោក Putin ថា ជាការសន្ទនាដ៏ល្អមួយ ហើយបាននិយាយថា វាមានរយៈពេលជាង ១ម៉ោង។

ចំណែកការិយាល័យរបស់លោក Zelenskiy បានឲ្យដឹងថា លោក Trump និងលោក Zelenskiy ជួបគ្នាតាមទូរសព្ទប្រហែល ១ម៉ោង ខណៈដែលវិមានក្រឹមឡាំង បានប្រាប់ថា ការសន្ទនាគ្នា រវាងលោក Putin ជាមួយលោក Trump មានរយៈពេលជិត ១ម៉ោងកន្លះ។

ជាមួយគ្នានេះ វិមានក្រឹមឡាំង បានបន្ថែមថា លោក Putin និងលោក Trump បានយល់ព្រមជួបគ្នា ហើយលោកប្រធានាធិបរុស្សីបានអញ្ជើញលោកប្រធានាធិបតីអាមេរិកឲ្យទៅទស្សនកិច្ចនៅទីក្រុងមូស្គូ៕