នាយកដ្ឋានពន្លត់អគ្គិភ័យបាននិយាយថា ការផ្ទុះហ្គាសដែលគេសង្ស័យ បានផ្ទុះនៅក្នុងហាងមួយកន្លែងក្នុងទីក្រុង Taichung កោះតៃវ៉ាន់ភាគកណ្តាល បណ្តាលឲ្យមនុស្សយ៉ាងហោចណាស់៤នាក់ស្លាប់ និង២៤នាក់ផ្សេងទៀតរងរបួស នៅថ្ងៃព្រហស្បតិ៍នេះ។

នាយកដ្ឋាន បាននិយាយនៅក្នុងសេចក្តីថ្លែងការណ៍ថា ការផ្ទុះបានកើតឡើងនៅអគារជាន់ទី១២ ជាកន្លែងកំពុងមានការសាងសង់ ដោយការខូចខាតមានចាប់ពីជាន់ទី៩ ឡើងទៅ។

មជ្ឈមណ្ឌលលក់អាហាររបស់ហាង Taichung Shin Kong Mitsukoshi ស្ថិតនៅជាន់ទី១២ ត្រូវបានបិទនៅពេលនោះ ដោយសារតែការងារសាងសង់។

អាជ្ញាធរសុខាភិបាល បាននិយាយឲ្យដឹងថា អ្នករងរបួសម្នាក់ក្នុងចំណោមអ្នករងរបួសទាំង២៤នាក់ ស្ថិតក្នុងបន្ទប់សង្គ្រោះបន្ទាន់របស់មន្ទីរពេទ្យ។

មេដឹកនាំកោះតៃវ៉ាន់ លោក ឡៃ ឆឹងតឺ បានសរសេរនៅលើទំព័រហ្វេសប៊ុករបស់លោក ដោយបានអំពាវនាវឱ្យមានការស៊ើបអង្កេតឱ្យបានឆាប់រហ័ស ទៅលើមូលហេតុនៃការផ្ទុះនេះ។