អ្នកជំនាញសន្តិសុខប្រព័ន្ធអ៊ីនធឺណិត បានរកឃើញថា បណ្តាញផ្ដល់ព័ត៌មានមិនពិតតាមប្រព័ន្ធអ៊ីនធឺណិតដែលភ្ជាប់ទំនាក់ទំនងជាមួយរុស្ស៊ី កំពុងផ្សព្វផ្សាយនូវព្រមានរបស់ទីភ្នាក់ងារចារកម្មក្លែងក្លាយ ពាក់ព័ន្ធនឹងការវាយប្រហារភេរវករ ក្នុងប្រទេសអាល្លឺម៉ង់ នៅមុនការបោះឆ្នោតក្នុងខែនេះ ដែលជាការប៉ុនប៉ងជាក់ស្តែង ដើម្បីបង្កជាការភ័យខ្លាច និងធ្វើឲ្យចំនួនអ្នកបោះឆ្នោតថយចុះ ។

ជាមួយគ្នានេះ ក្រុមអ្នកស្រាវជ្រាវបានឲ្យដឹងទៀតថា បណ្តាញនានា ក៏កំពុងផ្សព្វផ្សាយពាក្យចចាមអារ៉ាមដែលគ្មានមូលដ្ឋាន ក្នុងគោលបំណងបង្ខូចកេរ្តិ៍ឈ្មោះរបស់លោក Friedrich Merz ជាមេដឹកនាំក្រុមអភិរក្សនិយម ដែលកំពុងនាំមុខនៅក្នុងការស្ទង់មតិ លើក្រុមជម្រើសទី២ ដែលមាននិន្នាការលម្អៀងទៅរុស្ស៊ី គឺណបក្សជម្រើសផ្សេងទៀត សម្រាប់អាល្លឺម៉ង (AfD)។

បណ្ដាអ្នកជំនាញដែលធ្វើការជាមួយអង្គការសិទ្ធិមនុស្សអាល្លឺម៉ង់ គឺវេទិកាសង្គមស៊ីវិល និងមូលនិធិ Robert Bosch គឺជាអ្នកមានបទពិសោធន៍ ក្នុងកិច្ចប្រឹងប្រែង ដើម្បីប្រយុទ្ធប្រឆាំងនឹងប្រតិបត្តិការជះឥទ្ធិពលរបស់រុស្ស៊ី ដែលមិនចង់ឲ្យត្រូវបានគេកំណត់អត្តសញ្ញាណ សម្រាប់ហេតុផលសុវត្ថិភាព។

សារព័ត៌មាន Reuters អាចពិនិត្យមូលដ្ឋានទិន្នន័យពេញលេញនៃការបង្ហោះ និងបញ្ជាក់ពីការជំរុញដល់យុទ្ធនាការនៃការបង្ហោះដែលភាគច្រើនមានប្រភពនៅលើបណ្ដាញសង្គម X ដោយមានវីដេអូដែលបន្ទាប់មកត្រូវបានចែករំលែកនៅលើវេទិកាបណ្ដាញសង្គមយ៉ាងទូលំទូលាយ។ អ្នកស្រាវជ្រាវបានរកឃើញថា ការបង្ហោះត្រូវបានចូលមើលប្រហែល ២,៥លានដង មកទល់ពេលនេះ។ បណ្ដាញសង្គម X មិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយ លើការបង្ហោះនៅលើវេទិការបស់ខ្លួននេះ៕