ក្រុមមន្ត្រី បានប្រាប់ឲ្យដឹងថា មនុស្ស ១២នាក់ បានរងរបួស នៅពេលដែលគ្រាប់បែកដៃមួយគ្រាប់ បានផ្ទុះនៅក្នុងបារមួយ ក្នុងទីក្រុង Grenoble (គ្រេណូប្លិ៍) ភាគអាគ្នេយ៍នៃប្រទេសបារាំង កាលពីថ្ងៃពុធ (ទី១២ ខែកុម្ភៈ)។

នៅឯកន្លែងកើតហេតុដែលបុគ្គលិកសង្គ្រោះបន្ទាន់ បានបិទតំបន់នោះ លោករដ្ឋអាជ្ញា Francois Touret-de-Courcy (ហ្វ្រង់ស័រ ទូរេ ដឺ គួស៊ី) បានប្រាប់សារព័ត៌មានថា៖ «មានមនុស្សម្នាក់ បានចូលមក ហើយបានគប់គ្រាប់បែកដៃ ដោយមិនបាននិយាយអ្វីសោះ ហើយបានរត់ចេញទៅវិញបាត់»។

លោកបានប្រាប់ទៀតថា មនុស្ស ២នាក់ កំពុងស្ថិតក្នុងស្ថានភាពធ្ងន់ធ្ងរ ដោយបន្ថែមថា មាន «អតិថិជនជាច្រើន» នៅពេលដែលគ្រាប់បែកដៃនោះ បានផ្ទុះ ភ្លាមៗបន្ទាប់ពីម៉ោង ៨យប់ នៅបារ ក្នុងសង្កាត់ភូមិអូឡាំពិក (Olympic Village) ដែលត្រូវបានសាងសង់ឡើង នៅពេលទីក្រុងដ៏ស្រស់ស្អាតមួយនេះធ្វើជាម្ចាស់ផ្ទះកីឡាអូឡាំពិករដូវរងា ឆ្នាំ១៩៦៨។

លោក Touret-de-Courcy (ទូរេ ដឺ គួស៊ី) បានបញ្ជាក់ថា ក្រុមអ្នកស៊ើបអង្កេត មិនទាន់កំណត់ពីមូលហេតុនៅឡើយទេ ប៉ុន្តែមិនជឿថា នេះគឺជា «ការវាយប្រហារភេរវកម្ម»។ លោកបាននិយាយថា៖ «គ្មានអ្វីដែលធ្វើឲ្យយើងគិតថា វាជាប់ពាក់ព័ន្ធនឹងអំពើភេរវកម្មនោះទេ» ដោយហៅការវាយប្រហារនោះថា ជា «អំពើហិង្សាខ្លាំងក្លា» ដែល «អាចនឹងជាប់ពាក់ព័ន្ធករណីច្រើន»។

លោកបាននិយាយថា ក្រុមអ្នកស៊ើបអង្កេត កំពុងសម្លឹងមើលករណីដែលអាចមានជាប់ពាក់ព័ន្ធនឹងការជួញដូរគ្រឿងញៀន ដោយបានបន្ថែមថា ការរៀបរាប់មួយចំនួន បានបង្ហាញថា ជនសង្ស័យក៏មានកាន់កាំភ្លើងវែង Kalashnikov ផងដែរ៕