រដ្ឋមន្ត្រីការបរទេសអាមេរិក លោក Marco Rubio បាននិយាយថា ការដោះស្រាយស្ថានការណ៍លំបាកក្នុងប្រទេសអ៊ុយក្រែន ទាមទារឲ្យធ្វើការងារច្រើន និងកិច្ចប្រឹងប្រែងការទូត។

លោកបានចង្អុលបង្ហាញនៅក្នុងបទសម្ភាសន៍ជាមួយបណ្តាញព័ត៌មានខ្សែកាប News Nation ថា៖«ស្ថានការណ៍ នៅអ៊ុយក្រែន គឺស្មុកស្មាញ និងលំបាក ហើយវាជារឿងមួយ ដែលនឹងត្រូវការធ្វើការងារយ៉ាងច្រើន កិច្ចការទូតដ៏លំបាក។ នេះគឺជាសង្រ្គាម ដែលលោកប្រធានាធិបតី បានបញ្ជាក់យ៉ាងច្បាស់ថា លោកចង់ឃើញវាចប់។

ប្រធានាធិបតីអាមេរិកលោក ដូណាល់ ត្រាំ (Donald Trump) បានប្រកាសកាលពីថ្ងៃទី ០៣ ខែកុម្ភៈថា សហរដ្ឋអាមេរិក ចាប់អារម្មណ៍ក្នុងការទទួលបានធនធានរ៉ែកម្ររបស់អ៊ុយក្រែន ហើយចង់ឲ្យទីក្រុង      គីវ    ផ្តល់ការធានា ដែលពាក់ព័ន្ធ។ កាលពីថ្ងៃទី ០៤ ខែកុម្ភៈ លោកបាននិយាយដោយក្តីសង្ឃឹមថា កិច្ចព្រមព្រៀងសន្តិភាពមួយ នឹងត្រូវបានសម្រេច នៅពេលណាមួយ នាពេលអនាគតដ៏ខ្លីនោះ។