មន្ត្រីសន្តិសុខរុស្ស៊ី លោក Dmitry Medvedev នៅថ្ងៃព្រហស្បតិ៍ (ទី១៣ ខែកុម្ភៈ) បាននិយាយថា អឺរ៉ុបមានការច្រណែន និងខឹងសម្បា ចំពោះការជជែកតាមទូរសព្ទ រវាងប្រធានាធិបតីរុស្ស៊ី លោក Vladimir Putin និងសមភាគីអាមេរិក លោក Donald Trump ព្រោះវាបង្ហាញថា ឥទ្ធិពលរបស់តំបន់នេះ នៅលើឆាកអន្តរជាតិ បានចុះខ្សោយហើយ។

ការសន្ទនាគ្នា រវាងលោក Trump និងលោក Putin កាលពីថ្ងៃពុធ (ទី១២ ខែកុម្ភៈ) បានធ្វើឲ្យមានការព្រួយបារម្ភ ក្នុងចំណោមអ្នកនយោបាយអឺរ៉ុបមួយចំនួន ដែលថា មេដឹកនាំទាំង២ អាចព្យាយាមឲ្យមានកិច្ចព្រមព្រៀង ស្តីពីសង្រ្គាមអ៊ុយក្រែន តាមរយៈលក្ខខណ្ឌដែលមិនចំណេញដល់ទីក្រុងគីវ។ ហើយរដ្ឋមន្ត្រីការពារជាតិអាល្លឺម៉ង់ បាននិយាយនិយាយថ្ងៃព្រហស្បតិ៍ថា លោកមានការសោកស្តាយដែលរដ្ឋបាលសហរដ្ឋអាមេរិក បានធ្វើរួចហើយនូវអ្វីដែលលោកហៅថា ជាសម្បទានដល់រុស្ស៊ី សូម្បីតែទើបចាប់ផ្តើមកិច្ចចរចាក៏ដោយ។

លោក Medvedev ដែលជាអតីតប្រធានាធិបតីរុស្ស៊ី បានសរសេរនៅលើកម្មវិធីផ្ញើសារ Telegram ថា៖ «ក្រុមអឺរ៉ុបដែលគេលែងត្រូវការ មិនសប្បាយចិត្ត អមដោយការច្រណែន និងកំហឹង»។ លោកបានបន្តថា អឺរ៉ុបមិនត្រូវបានផ្ដល់ដំណឹងប្រាប់អំពីផែនការជជែកគ្នាតាមទូរសព្ទរបស់លោក Putin និងលោក Trump ឬពិគ្រោះយោបល់ អំពីខ្លឹមសារនៃការជជែកនេះទេ។

លោក Medvedev បានសង្កត់ធ្ងន់ថា៖ «នេះបង្ហាញពីតួនាទីពិតប្រាកដរបស់តំបន់នេះ នៅក្នុងពិភពលោក។ ខ្ញុំអាចនិយាយបានថា ឥទ្ធិពលរបស់អឺរ៉ុបបានអស់ហើយ»៕