ប្រជាជនបែលហ្ស៊ិករាប់ពាន់នាក់ បាននាំគ្នាធ្វើបាតុកម្ម នៅថ្ងៃព្រហស្បតិ៍ (ទី១៣ ខែកុម្ភៈ) នេះ ដើម្បីតវ៉ា ចំពោះផែនការកែទម្រង់ប្រាក់សោធននិវត្តន៍របស់រដ្ឋាភិបាលថ្មី ដែលថ្ងៃដំបូងនៃកូដកម្មរយៈពេលជាច្រើនថ្ងៃ ដែលបានធ្វើឲ្យចរាចរណ៍ផ្លូវអាកាសទាំងអស់នៅក្នុងប្រទេសត្រូវផ្អាក។

អាកាសយានដ្ឋាន នៅទីក្រុងប្រ៊ុចសែល បានប្រាប់ឲ្យដឹងថា ជើងហោះហើរចំនួន ៤៣០វ៉ុល ត្រូវបានលុបចោលនៅថ្ងៃព្រហស្បតិ៍នេះ តែបានបន្ថែមថា ការរំខានដល់វិស័យចរាចរណ៍ផ្លូវអាកាស នឹងមានរយៈពេលតែមួយថ្ងៃប៉ុណ្ណោះ។

ក្រុមអ្នកតវ៉ា បានកាន់បដាដែលមានពាក្យស្លោក ដូចជា «យើងមិនមែនជាផ្លែក្រូចឆ្មារ» ដែលមានន័យថា ពួកគេមិនអាចត្រូវបានគាបសង្កត់ ឬកេងប្រវ័ញ្ចបានតាមចិត្តនោះទេ ខណៈខ្លះទៀតបង្ហាញពីផ្លាកសរសេរអក្សរឡាតាំង ជាការសំដៅទៅដល់ទំនោររបស់នាយករដ្ឋមន្រ្តីថ្មី លោក Bart De Wever ដែលចូលចិត្តបញ្ចូលសម្ដីភាសាឡាតាំងនៅពេលណាដែលអាចធ្វើទៅបាន។

កូដកម្មក៏ត្រូវបានគេរំពឹងថា នឹងរំខានដល់ការដឹកជញ្ជូនសាធារណៈ និងសេវាប្រៃសណីយ៍ ដោយមានអ្នកពន្លត់អគ្គិភ័យ និងបុគ្គលិកយោធាចូលរួមការតវ៉ានេះផងដែរ។

គួរបញ្ជាក់ថា គម្រោងកែទម្រង់ប្រាក់សោធននិវត្តន៍ ផ្តល់ប្រាក់រង្វាន់ដល់អ្នកដែលធ្វើការផុតអាយុចូលនិវត្តន៍ ដោយមានរយៈពេល ៣៥ឆ្នាំ ខណៈពេលដែលអ្នកចូលនិវត្តន៍លឿន ពោលគឺមិនគ្រប់ ៣៥ឆ្នាំ ប្រឈមនឹងការពិន័យ។ ប្រព័ន្ធថ្មីនេះ គឺមិនសូវអំណោយផលដល់អ្នកដែលមានប្រាក់ចំណូលទាបនោះទេ បើប្រៀបធៀបទៅនឹងប្រព័ន្ធមុន ដែលផ្តល់ទឹកប្រាក់សរុបផ្អែកលើរយៈពេលអាជីព៕