រដ្ឋមន្រ្តីក្រសួងរតនាគារសហរដ្ឋអាមេរិកលោក Scott Bessent បាននិយាយកាលពីថ្ងៃពុធថា កិច្ចព្រមព្រៀងរ៉ែរវាងទីក្រុងគីវ និងទីក្រុងវ៉ាស៊ីនតោន នឹងផ្តល់ជាខែលសន្តិសុខដល់ប្រទេសអ៊ុយក្រែន នៅក្រោយសង្រ្គាម ហើយប្រធានាធិបតីអ៊ុយក្រែនលោក Volodmyr Zelenskiy និយាយថា លោកសង្ឃឹមថា នឹងឈានដល់កិច្ចព្រមព្រៀងនាពេលក្រោយក្នុងសប្តាហ៍នេះ ។

លោក Bessent ដែលជាមន្រ្តីកម្រិតគណៈរដ្ឋមន្រ្តីលើកដំបូងក្នុងក្រុមរបស់លោក Donald Trump បំពេញទស្សនកិច្ចមកកាន់ទីក្រុងគីវ បាននិយាយបែបនេះ ក្រោយលោក Zelenskiy និយាយថា លោកបានត្រៀមខ្លួនរួចរាល់ក្នុងការធ្វើកិច្ចព្រមព្រៀងបើកធនធានរ៉ែរបស់អ៊ុយក្រែនដល់ការវិនិយោគទុនរបស់សហរដ្ឋអាមេរិក ស្របពេលរូបលោកព្យាយាមទទួលបានការគាំទ្ររបស់ប្រធានាធិបតីសហរដ្ឋអាមេរិក ។

លោក Trump ដែលចង់បញ្ចប់យ៉ាងឆាប់រហ័សសង្រ្គាមជាមួយរុស្ស៊ី ប៉ុន្តែពុំបាននិយាយថាតើនឹងបន្តជំនួយយោធាដែលចាំបាច់ដល់ទីក្រុងគីវនោះ និយាយថា លោកចង់បានរ៉ែក្រោមដីដ៏កម្រតម្លៃ ៥០០ពាន់លានដុល្លារពីអ៊ុយក្រែន ហើយការគាំទ្ររបស់ទីក្រុងវ៉ាស៊ីងតោន ចាំបាច់ត្រូវការធានា ។

លោក Zelenskiy បាននិយាយប្រាប់ក្រុមអ្នកសារព័ត៌មានក្រោយជំនួបជាមួយលោក Bessent ថា ភាគីសហរដ្ឋអាមេរិកបានបង្ហាញកិច្ចព្រមព្រៀងស្នើសុំដំបូងដែលទីក្រុងគីវនឹងសិក្សា ហើយលោកសង្ឃឹមថា ពួកគេនឹងអាចឈានដល់កិច្ចព្រមព្រៀងនៅកិច្ចប្រជុំសន្តិសុខក្រុង Munich នាថ្ងៃទី ១៤-១៦ ខែកុម្ភៈ ។

ដោយឡែក លោក Bessent បាននិយាយប្រាប់ក្រុមអ្នកសារព័ត៌មានថា កិច្ចព្រមព្រៀងរ៉ែ គឺជាផ្នែកមួយនៃកិច្ចព្រមព្រៀងសន្តិភាពធំជាងនេះ ដែលលោក Trumpមានក្នុងចិត្ត ហើយដំណើរទស្សនកិច្ចលើកដំបូងរបស់លោកមកកាន់ទីក្រុងគីវ បង្ហាញថា សង្រ្គាមគឺជាអាទិភាពកំពូលសម្រាប់រដ្ឋបាលលោក Trump ៕