យោងតាមការអះអាងរបស់ក្រុមអាជ្ញាធរសុខភាពក្នុងស្រុក បានឲ្យដឹងថា អគ្គិភ័យឆាបឆេះរោងចក្រសម្លៀកបំពាក់នៅទីក្រុង Rio de Janeiroប្រទេសប្រេស៊ីល បណ្តាលឲ្យមនុស្សយ៉ាងហោច ២០នាក់ រងរបួស ។

 ក្រុមភ្នាក់ងារពន្លត់អគ្គិភ័យ បានសង្រ្គោះមនុស្សចេញតាមបង្អួចរោងចក្រ ពេលដែលអណ្តាតភ្លើងហ៊ុមព័ទ្ធរោងចក្រស្ថិតក្នុងសង្កាត់ Ramos ហើយនិងបានជម្លៀសមនុស្សចេញពីអគារនៅក្បែរនោះផងដែរ ដែលរងការគំរាមកំហែងពីអគ្គិភ័យ ។

 ក្រុមភ្នាក់ងារពន្លត់អគ្គិភ័យ បានឡើងតាមជណ្តើរដើម្បីដល់បង្អួច ជាទីដែលក្រុមកម្មករស្រែករកជំនួយ ពេលដែលផ្សែងខ្មៅយ៉ាងក្រាស់ហុយចេញពីអគារនៅភាគខាងជើងទីក្រុង ។

 តំបន់ជុំវិញរោងចក្រ ត្រូវបានបិទដោយក្រុមអាជ្ញាធរ ខណៈដែលក្រុមភ្នាកងារពន្លត់អគ្គិភ័យបានព្យាយាមគ្រប់គ្រងអណ្តាតភ្លើង ។

 រដ្ឋមន្រ្តីក្រសួងសុខាភិបាលរដ្ឋ Rio លោក Claudia Mello និយាយថា មនុស្ស ៨នាក់ រួមទាំងស្រ្តី ៥នាក់ និងបុរស ៣នាក់ ស្ថិតក្នុងស្ថានភាពធ្ងន់ធ្ងរ ដោយសារស្រូបផ្សែង និងរលាកភ្លើង ។

 ចំណែកឯ សេវាកម្មទំនាក់ទំនងនាយកដ្ឋានពន្លត់អគ្គិភ័យរដ្ឋ Rio បាននិយាយប្រាប់ទីភ្នាក់ងារព័ត៌មាន AFPថា មនុស្ស ២១នាក់ ត្រូវបានបញ្ជូនទៅព្យាបាលក្នុងមន្ទីរពេទ្យ ក្នុងនោះជនរងគ្រោះ ១២នាក់ ស្ថិតក្នុងស្ថានភាពធ្ងន់ធ្ងរ ។

 ដោយឡែក មូលហេតុដែលបណ្តាលឲ្យអគ្គិភ័យនេះ កើតឡើងមិនត្រូវបានគេដឹងច្បាស់ភ្លាមៗនោះទេ ខណៈការស៊ើបអង្កេតកំពុងធ្វើឡើង ៕