គណៈកម្មាធិការកាកបាទក្រហមអន្តរជាតិ (ICRC) នៅថ្ងៃព្រហស្បតិ៍ (ទី១៣ ខែកុម្ភៈ) នេះ បានឲ្យដឹងថា ចំនួនមនុស្សបាត់ខ្លួន ក្នុងសង្គ្រាម រវាងអ៊ុយក្រែន និងរុស្ស៊ី បានកើនឡើងទ្វេដង ពោលគឺដល់ចំនួន ៥០.០០០នាក់ ក្នុងរយៈពេលមួយឆ្នាំកន្លងមកនេះ។

ប្រធានការិយាល័យភ្នាក់ងារកណ្តាលតាមដានជម្លោះរបស់ ICRC គឺលោក Dusan Vujasanin បាននិយាយថា៖ «កាលពីឆ្នាំមុនចំនួនអ្នកបាត់ខ្លួនដែល ICRC បានចងក្រងជាឯកសារមានចំនួន ២៣.០០០នាក់។ មួយឆ្នាំក្រោយមក ចំនួននោះ បានកើនឡើងទ្វេដង ហើយការកត់ត្រារបស់ ICRC គឺប្រហែល ៥០.០០០នាក់នៃករណីមនុស្សបាត់ខ្លួននេះ»។ 

លោកបានបន្ថែមថា ប្រហែល ៩០ភាគរយនៃអ្នកបាត់ខ្លួនទាំងនោះ ជាទាហាន និងស្ត្រី។ តែយ៉ាងណាក្ដី ICRC មិនបានផ្តល់ការវិភាគនៃអ្នកបាត់ខ្លួននោះ តាមរយៈសញ្ជាតិឡើយ។

ចាប់តាំងពីខែមីនា ឆ្នាំ២០២២ នៅពេលសង្រ្គាមផ្ទុះឡើង ICRC បានសម្របសម្រួលការស្វែងរកមនុស្សបាត់ខ្លួន តាមរយៈការិយាល័យភ្នាក់ងារកណ្តាលរបស់ខ្លួន ដែលទាំងរុស្ស៊ី និងអ៊ុយក្រែន ចែករំលែកព័ត៌មានជាមួយអង្គការអន្តរជាតិនេះ។

អង្គការបានលើកឡើងថា «ការកើនឡើងចំនួនដ៏ច្រើន» នៃរបាយការណ៍អ្នកបាត់ខ្លួន ដែលជាមធ្យមមានពី ១.០០០នាក់ ទៅ ៥.០០០នាក់ ក្នុងមួយខែ គឺដោយសារជម្លោះមានសភាពកាន់តែខ្លាំងឡើងៗ ហើយវិធីសាស្ត្រតាមដានការរាយការណ៍ប្រសើរជាងមុន ដូចជាការមានឯកសារតាមប្រព័ន្ធអ៊ីនធឺណិត សម្រាប់គ្រួសារជាដើម៕