រដ្ឋមន្រ្តីក្រសួងការពារជាតិអាល្លឺម៉ង់លោក Boris Pistorius និយាយនៅថ្ងៃព្រហស្បតិ៍នេះថា លទ្ធភាពនៃសមាជិកភាពអង្គការណាតូរបស់អ៊ុយក្រែន និងសំនួរថាតើពួកគេគួរយល់ព្រមផ្តល់សម្បទានដែនដីណាមួយដល់រុស្ស៊ី មិនគួរដកចេញពីលើតុចរចានោះទេ មុនកិច្ចប្រជុំសន្តិភាពជាមួយរុស្ស៊ី ចាប់ផ្តើម ។

មុនជំនួបថ្នាក់រដ្ឋមន្រ្តីការពារជាតិសម្ព័ន្ធយោធាណាតូនៅទីក្រុងព្រុចសែល ប្រទេសបែលហ្ស៊ិក លោក Pistorius និយាយថា រដ្ឋបាលលោក Trumpបានផ្តល់សម្បទានជាសាធារណៈរួចទៅហើយដល់លោក Putin មុនកិច្ចចរចាចាប់ផ្តើម ។ 

លោកបន្តថា តាមទស្សនៈរបស់លោក វាគួរតែល្អប្រសើរជាងកាលដែលនិយាយពីលទ្ធភាពសមាជិកភាពអង្គការណាតូរបស់អ៊ុយក្រែន ឬលទ្ធភាពនៃការបាត់បង់ទឹកដីរបស់ប្រទេសមួយនេះ នៅលើតុចរចាសិន ហើយមិនត្រូវដកវាចេញពីលើតុជាមុនបែបនេះទេ ។

សេចក្តីអត្ថាធិប្បាយរបស់លោកត្រូវបានបន្ទរដោយសមភាគីបារាំងលោក Sébastien Lecornu ដែលបានព្រមានប្រឆាំងរូបមន្ត “សន្តិភាពតាមរយៈភាពទន់ខ្សោយ” ជាជាង “សន្តិភាពតាមរយៈខ្លាំង”របស់លោក Trump ។

កាលពីថ្ងៃពុធម្សិលមិញ លោក Trumpនិយាយថា លោកបានជជែកគ្នាតាមទូរស័ព្ទរយៈពេលជាង ១ម៉ោងជាមួយលោក Putin ហើយប្រទេសទាំង ២នឹងចាប់ផ្តើមចរចា ដើម្បីព្យាយាមបញ្ចប់សង្រ្គាមអ៊ុយក្រែន ។

ដោយឡែក រដ្ឋមន្រ្តីក្រសួងការពារជាតិសហរដ្ឋអាមេរិកលោក Pete Hegseth បាននិយាយថា វាមិនប្រាកដនិយមនោះទេសម្រាប់ឲ្យអ៊ុយក្រែនស្តាឡើងវិញព្រំដែនមុនឆ្នាំ ២០១៤ ហើយពួកគេក៏មិនត្រូវអនុញ្ញាតឲ្យចូលរួមជាមួយអង្គការណាតូនោះដែរ ៕