ប្រធានាធិបតីសហរដ្ឋអាមេរិក លោក ដូណាល់ ត្រាំ បាននិយាយកាលពីថ្ងៃព្រហស្បតិ៍ (ទី១៣ ខែកុម្ភៈ) ថា អ៊ុយក្រែននឹងត្រូវចូលរួមក្នុងកិច្ចចរចាសន្តិភាពជាមួយរុស្ស៊ី ទោះបីជាទីក្រុងគីវ បាននិយាយថា វាលឿនពេកក្នុងការចរចាជាមួយទីក្រុងមូស្គូ នៅក្នុងសន្និសីទស្តីពីសន្តិសុខ នៅថ្ងៃសុក្រនេះ។

លោក Trump បាននិយាយទៅកាន់អ្នកសារព័ត៌មាននៅសេតវិមានបាននិយាយថា អ៊ុយក្រែននឹងមានកៅអីនៅឯតុ ក្នុងអំឡុងពេលចរចាសន្តិភាពណាមួយជាមួយរុស្ស៊ី ជុំវិញការបញ្ចប់សង្គ្រាម។ លោក Trump និយាយថា យើងនឹងមានប្រទេសអ៊ុយក្រែនចូលរួម យើងមានរុស្ស៊ី ហើយយើងក៏មានអ្នកផ្សេងៗទៀតចូលរួម។

នៅពេលត្រូវបានសួរថាតើលោកទុកចិត្តលោកពូទីនដែរឬទេ នោះលោកបាននិយាយថា «ខ្ញុំជឿថាលោក ពូទីន ចង់ឃើញនូវអ្វីដែលកើតឡើង។ ខ្ញុំទុកចិត្តគាត់លើប្រធានបទនេះ»។ លោក Trump បាននិយាយថា មន្ត្រីអាមេរិក និងរុស្ស៊ី នឹងជួបប្រជុំគ្នានៅទីក្រុង Munich ប្រទេសអាល្លឺម៉ង់ នៅថ្ងៃសុក្រនេះ ហើយអ៊ុយក្រែនក៏ត្រូវបានអញ្ជើញ ផងដែរ។

ទោះជាយ៉ាងណា ទីប្រឹក្សាប្រធានាធិបតីអ៊ុយក្រែន លោក Volodymyr Zelenskyy បាននិយាយថា ទីក្រុងគីវ មិនរំពឹងថានឹងជួបពិភាក្សាជាមួយភាគីរុស្ស៊ីនៅក្នុងសន្និសីទសន្តិសុខប្រចាំឆ្នាំនៅទីក្រុង Munich នៅថ្ងៃសុក្រនេះទេ ហើយជឿជាក់ថា សហរដ្ឋអាមេរិក សហភាពអឺរ៉ុប និងអ៊ុយក្រែន ត្រូវការជំហររួមមួយ មុនពេលពិភាក្សាជាមួយទីក្រុងមូស្គូ។

លោក Trump បាននិយាយទៅកាន់អ្នកសារព័ត៌មានថា នឹងមានកិច្ចប្រជុំមន្ត្រីជាន់ខ្ពស់ ទោះបីជាមិនមែនជាមេដឹកនាំក៏ដោយ ដែលមកពីប្រទេសចំនួនបីនៅក្នុងប្រទេសអារ៉ាប៊ីសាអូឌីត នៅសប្តាហ៍ក្រោយ ក្នុងគោលបំណងបញ្ចប់សង្រ្គាម។

យោងតាមក្រសួងការបរទេសបានឲ្យថា កាលពីថ្ងៃព្រហស្បតិ៍ រដ្ឋមន្ត្រីការបរទេសសហរដ្ឋអាមេរិក លោក Marco Rubio បានពិភាក្សាអំពី «តម្រូវការសម្រាប់ផ្នែកការទូតដ៏ជាក់លាក់» ដើម្បីបញ្ចប់សង្រ្គាម នៅក្នុងការសន្ទនាតាមទូរស័ព្ទជាមួយរដ្ឋមន្ត្រីការបរទេស អ៊ុយក្រែន លោក Andrii Sybiha ។