ប្រធានាធិបតីបារាំង បានជំរុញអាជ្ញាធរថ្មី ក្នុងសាធារណរដ្ឋអារ៉ាប់ស៊ីរី ឲ្យពិចារណាលើភាពជាដៃគូជាមួយក្រុមចម្រុះអន្តរជាតិមានមូលដ្ឋាននៅអ៊ីរ៉ាក់ ដែលកំពុងប្រយុទ្ធប្រឆាំងនឹងក្រុមរដ្ឋឥស្លាម Daesh ដើម្បីទប់ស្កាត់ប្រទេសនេះ ពីអស្ថិរភាព ក្នុងរយៈពេលអន្តរកាលរបស់ខ្លួន។

រដ្ឋមន្ត្រីការបរទេសស៊ីរី បានចូលរួមសន្និសីទអន្តរជាតិ នៅទីក្រុងប៉ារីស កាលពីថ្ងៃព្រហស្បតិ៍ ជាកន្លែងដែលមហាអំណាចក្នុងតំបន់ និងលោកខាងលិច បានពិនិត្យមើលពីរបៀបការពារប្រទេស ក្នុងអំឡុងពេលការផ្លាស់ប្តូរដ៏ផុយស្រួយរបស់ខ្លួន ចំពេលអស្ថិរភាពដែលកំពុងបន្ត នៅទូទាំងមជ្ឈឹមបូព៌ា។

លោក Asaad Hassan Al-Shibani កំពុងដឹកនាំគណៈប្រតិភូសម្រាប់ការធ្វើដំណើរលើកដំបូង ទៅកាន់សហភាពអឺរ៉ុប ចាប់តាំងពីការផ្តួលរំលំនៃប្រធានាធិបតីផ្តាច់ការស៊ីរី លោក បាសា អាល់អាសាដ( Bashar al-Assad) កាលពីខែធ្នូ និងប៉ុន្មានថ្ងៃបន្ទាប់ពីប្រធានាធិបតីបារាំង លោក អេម៉ានុយអែល ម៉ាក្រុង (Emmanuel Macron) បានអញ្ជើញប្រធានាធិបតីបណ្តោះអាសន្នស៊ីរី Ahmed Al-Sharaa ទៅទស្សនកិច្ចប្រទេសបារាំង។

ថ្លែងនៅក្នុងសន្និសីទនោះ លោកប្រធានាធិបតីបារាំង បាននិយាយថា ទីក្រុងប៉ារីស បានត្រៀមខ្លួនជាស្រេច ក្នុងការជួយប្រទេសស៊ីរី ក្នុងការប្រយុទ្ធប្រឆាំងក្រុមភេរវករ និងដើម្បីទប់ស្កាត់ប្រទេសនេះ មិនឲ្យក្លាយជាមូលដ្ឋានសម្រាប់កងជីវពលអ៊ីរ៉ ដើម្បីបង្កអស្ថិរភាពក្នុងតំបន់ ជាថ្មីទៀត។