កាសែត Wall Street Journal បានរាយការណ៍កាលពីថ្ងៃព្រហស្បតិ៍ (១៣ កុម្ភៈ) សប្ដាហ៍នេះថា អនុប្រធានាធិបតីអាមេរិក លោក JD Vance បាននិយាយថា សហរដ្ឋអាមេរិក ដាក់ទណ្ឌកម្មលើទីក្រុងមូស្គូ និងលទ្ធភាពសកម្មភាពយោធា ប្រសិនបើប្រធានាធិបតីរុស្ស៊ី លោក Vladimir Putin មិនយល់ព្រមលើកិច្ចព្រមព្រៀងសន្តិភាពជាមួយអ៊ុយក្រែន ដែលធានាឯករាជ្យភាពយូរអង្វែងរបស់ទីក្រុងគីវ។

លោក Vance បាននិយាយក្នុងបទសម្ភាសន៍មួយជាមួយសារព័ត៌មាននេះថា៖ "មានថ្នូរចរចាជាច្រើនដូចជាសេដ្ឋកិច្ច ហើយប្រាកដណាស់ក៏មានរឿងយោធាដែរ" ដែលអាមេរិក អាចប្រើទប់ទល់នឹងលោក Putin។

ប្រធានាធិបតីអាមេរិក លោក Donald Trump កាលពីថ្ងៃពុធសប្ដាហ៍នេះ បានពិភាក្សាអំពីសង្គ្រាមជាមួយប្រធានាធិបតីរុស្ស៊ី លោក Vladimir Putin និងដាច់ដោយឡែកពីគ្នាជាមួយប្រធានាធិបតីអ៊ុយក្រែន លោក Volodymyr Zelenskiy ហើយបានប្រាប់មន្ត្រីអាមេរិក ឱ្យចាប់ផ្តើមកិច្ចពិភាក្សាស្តីពីការបញ្ចប់ជម្លោះរយៈពេលជិត ៣ឆ្នាំនេះ។

ប្រជាជនអ៊ុយក្រែន បារម្ភថាលោក Trump កំពុងរៀបចំលក់ប្រទេសរបស់ពួកគេ បន្ទាប់ពីកិច្ចពិភាក្សាតាមទូរសព្ទនោះ។ ទន្ទឹមនឹងនេះ លោក Trump កាលពីថ្ងៃព្រហស្បតិ៍បាននិយាយថា អ៊ុយក្រែន នឹងមានវត្តមានចូលរួមក្នុងកិច្ចចរចាសន្តិភាពជាមួយរុស្ស៊ី៕