អឺរ៉ុប ដែលកំពុងតែចុះខ្សោយ បានប្រឈមមុខនឹងរឿងឈឺក្បាលផ្ទួនក្នុងប៉ុន្មានឆ្នាំថ្មីៗនេះ រាប់ចាប់ពីការទប់ទល់នឹងលោកប្រធានាធិបតីអាមេរិក Donald Trump រហូតដល់រឿងអ៊ុយក្រែន។ ការចាប់ផ្តើមនៃសន្និសិទសន្តិសុខទីក្រុង Munich មានទម្លាប់ត្រូវបានគ្របដណ្ដប់ដោយការបង្ហាញអំណាចរបស់លោកប្រធានាធិបតីរុស្ស៊ី Vladimir Putin។ កាលឆ្នាំ២០២២ ស្ថាប័នសន្តិសុខឆ្លងដែនអាត្លង់ទិកនេះបានប្រមូលផ្តុំគ្នាដោយដឹងថាលោក Putin ត្រៀមបញ្ចេញប្រតិបត្តិការយោធាលើទីក្រុងគីវ។

នៅខែកុម្ភៈ ឆ្នាំ២០២៤ កិច្ចប្រជុំនោះពោរពេញដោយភាពចម្រូងចម្រាស់ក្នុងពេលដែលអតីតមេដឹកនាំបក្សប្រឆាំងម្នាក់បានស្លាប់ក្នុងពន្ធនាគាររុស្ស៊ី ហើយនៅឆ្នាំ២០២៥ នេះ រុស្ស៊ីកំពុងឈានទៅដល់ការបើកកិច្ចចរចាជាមួយលោក Trump ដែលអ្នកវិភាគជាច្រើនបានព្យាករថា នឹងផ្ដល់ឱ្យទីក្រុងមូស្គូ មិនត្រឹមតែទឹកដីអ៊ុយក្រែនប៉ុណ្ណោះទេ ប៉ុន្តែក៏បន្ថយស្ថានភាពរដ្ឋឯករាជ្យអ៊ុយក្រែនផងដែរ។

សម្រាប់ទ្វីបអឺរ៉ុប ទាំងនេះគឺជាភាពអាម៉ាស់មួយ។ ការបង្ហើបរបស់លោក Trump និងរដ្ឋមន្ត្រីការពារជាតិអាមេរិក លោក Pete Hegseth ពីវិធីសាស្រ្តបទឈប់បាញ់របស់ពួកគេ រួមទាំងការបដិសេធរបស់អាមេរិក ក្នុងការផ្តល់ធនធានបន្ថែមដល់អ៊ុយក្រែន បានក្លាយជារឿងដ៏ភ្ញាក់ផ្អើលមួយទៀត។ ពេលនេះ អឺរ៉ុបបានត្រឹមតែបន្ទោសខ្លួនឯងប៉ុណ្ណោះ។

បន្ទាប់ពីភាពច្របូកច្របល់នៃអាណត្តិដំបូងរបស់លោក Trump និងការដឹងច្បាស់ថាលោកអាចត្រលប់មកវិញ ការិយាធិបតេយ្យអឺរ៉ុប បានពិភាក្សាពីតម្រូវការទប់ទល់លោក Trump ដែលអឺរ៉ុបមិនទាន់មាននៅឡើយ។ ឥឡូវនេះ អឺរ៉ុបជួបបញ្ហាប្រឈមនៃការដាក់កងកម្លាំងរក្សាសន្តិភាពទៅក្នុងតំបន់ បូករួមទាំងភាពស្មុគស្មាញនៃជម្លោះអ៊ុយក្រែន ខណៈអតីតមន្រ្តីសន្តិសុខជាន់ខ្ពស់អឺរ៉ុបបានសារភាពថា ទ្វីបដ៏ចំណាស់មួយនេះមិនមានសមត្ថភាពធ្វើប្រតិបត្តិការដោយគ្មានវត្តមានអាមេរិកបាននោះទេ៕