ទីភ្នាក់ងារសារព័ត៌មានជាតិផ្លូវការរបស់ប្រទេសលីបង់ បានរាយការណ៍ថា ប្រធានសភារបស់ប្រទេសលីបង់ លោក Nabih Berri បានបដិសេធទាំងស្រុង ចំពោះការទាមទាររបស់អ៊ីស្រាអែល ក្នុងការទាមទារបន្តកាន់កាប់ទីតាំងចំនួន៥កន្លែង នៅភាគខាងត្បូងប្រទេសលីបង់ លើសពីថ្ងៃផុតកំណត់នៃការដកកងទ័ព នៅថ្ងៃទី១៨ ខែកុម្ភៈ ។

លោក Berri បានប្រាប់អ្នកសារព័ត៌មានក្រោយជួបជាមួយឧត្តមសេនីយ៍អាមេរិក លោក Jasper Jeffers ដែលជាប្រធានគណៈកម្មាធិការត្រួតពិនិត្យដែលមានសមាជិកប្រាំរូបនៃកិច្ចព្រមព្រៀងបទឈប់បាញ់ រវាងអ៊ីស្រាអែល និងក្រុមហេសបូឡា ថា «ខ្ញុំច្រានចោលការពិភាក្សាពីការបន្ថែមពេលការដកកងទ័ព»។ វាជាការទទួលខុសត្រូវរបស់អាមេរិកដើម្បីអនុវត្តការដកកងទ័ព បើមិនដូច្នេះទេ វានឹងបង្កឲ្យមានឧបសគ្គធំបំផុត សម្រាប់រដ្ឋាភិបាល។

លោកបាននិយាយថា ប្រសិនបើការកាន់កាប់របស់អ៊ីស្រាអែលនៅតែបន្ត មិនយូរមិនឆាប់គេនឹងដឹង។ នេះគឺជាទំនួលខុសត្រូវរបស់រដ្ឋលីបង់ ហើយកងទ័ពកំពុងបំពេញភារកិច្ចរបស់ខ្លួនទាំងស្រុងនៅភាគខាងត្បូងនៃទន្លេ Litani ។ 

យោងតាមទូរទស្សន៍ក្នុងស្រុក LBCI របស់ប្រទេសលីបង់ បានឲ្យដឹងថា លោក Berri បានច្រានចោលការដាក់ពង្រាយកងកម្លាំងបរទេសនៅតាមទីតាំងព្រំដែន ដោយសង្កត់ធ្ងន់ថា កងកម្លាំងបណ្តោះអាសន្នរបស់អង្គការសហប្រជាជាតិនៅក្នុងប្រទេសលីបង់ និងកងទ័ពលីបង់ បានត្រៀមយ៉ាងពេញលេញដើម្បីដោះស្រាយភារកិច្ចនេះ។