ភ្នំពេញ៖ ដើម្បីចូលរួមសកម្មភាពបោសសម្អាតមីននៅកម្ពុជា ធនាគារភីភីស៊ីប៊ែង PPCBank បានរៀបចំយុទ្ធនាការរៃអង្គាសលើកទី២ សរុបជាថវិកាចំនួន ១ម៉ឺនដុល្លាផ្តល់ទៅកាន់គម្រោងបោសសម្អាតមីនរបស់ អាប៉ូប៉ូ (APOPO)។

នៅថ្ងៃ១៦ ខែវិច្ឆិកា ឆ្នាំ២០២១នេះ ធនាគារ ធនាគារភីភីស៊ីប៊ែង (PPCBank) រៀបចំដំណើរការការរៃអង្គាសលើកទី២ ដែលមានថវិការសរុបចំនួន១ម៉ឺនដុល្លា និងចូលរួមពីអតិថិជន ក៏ដូចជាបុគ្គលិកធនាគាររបស់ខ្លួនសម្រាប់ផ្តល់ទៅគម្រោងរបស់APOPO។

នាឱកាសនោះ លោក បេក ជុងអីល (Baek Jongil) នាយកប្រតិបត្តិធនាគារ PPCBank បានមានប្រសាសន៍ថា ធនាគារPPCBankពិតជាមានមោទនភាពចំពោះការរៃអង្គាសក្នុងឆ្នាំនេះ ដោយសារតែចំនួនថវិកាដែលបានមកពីការរៃអង្គាសបានជួយAPOPO និង ហេរ៉ូរ៉ាត់ “HeroRATs” ក្នុងការសម្អាតមីន បានច្រើនជាងពីរដងនៃផ្ទៃដីដែលបានសម្អាតក្នុងឆ្នាំ២០២០កន្លងទៅ ដោយថវិកានេះត្រូវបានប្រគល់ដោយផ្ទាល់ទៅកាន់ APOPO ក្នុងការបោសសម្អាតមីនផ្ទៃដីចំនួន ៥ហិចតារបស់ប្រជាពលរដ្ឋនៅ ក្នុងខេត្តសៀមរាប។

លោក បានបញ្ជាក់ថា ថវិកាឧបត្ថម្ភនេះសម្រាប់គម្រោងតំបន់គោលដៅគឺនៅក្នុងឃុំស្រែណូយ ស្រុកវ៉ារិន ខេត្តសៀមរាប ដោយសារយុទ្ធនាការនេះ ដើម្បីជួយដល់ម្ចាស់ដីនិងប្រជាពលរដ្ឋដែលរស់នៅជុំវិញតំបន់នោះដែលបច្ចុប្បន្នកំពុងរស់នៅក្រោមការគំរាមកំហែងឥតឈប់ឈរពីគ្រាប់មីននិងយុទ្ធភណ្ឌមិនទាន់ផ្ទុះ(UXO)។ លោក បន្តថា កង្វល់ចម្បងក្នុងតំបន់នោះ គឺកុមារក្នុងភូមិងាយរងគ្រោះថ្នាក់ពីគ្រាប់មីនរាល់ពេលដែលពួកគេចេញទៅក្រៅ និងចេញពីសាលារៀន។

យ៉ាងណាក្តី នាយកប្រតិបត្តិធនាគារ PPCBank រូបនេះ បានលើកឡើងថា តាមរយៈការរួមចំណែកដ៏មាំមួនពីបុគ្គលិក និងអតិថិជនរបស់ធនាគារនឹងរួមចំណែកដល់ការប្រកបរបរចិញ្ចឹមជីវិតនៅលើដីស្រែចំការរបស់ប្រជាពលរដ្ឋបានឆាប់ហើយអាចរស់នៅដោយគ្មានការគំរាមកំហែងដោយសារគ្រាប់មីនតទៅទៀត។ លោក បានបន្ថែមថា ធនាគារ PPCBank សង្ឃឹមថានឹងមានក្រុមហ៊ុនឯកជន និងបុគ្គលជាច្រើនទៀតនឹងចូលរួមគាំទ្រ APOPO ដើម្បីរួមចំណែកកាន់តែច្រើនដល់សកម្មភាពសប្បុរសធម៌សង្គមមួយនេះ និងបន្តសកម្មភាពយុទ្ធនាការរៃអង្គាសប្រាក់ផ្តល់APOPO សម្រាប់ឆ្នាំ២០២២ខាងមុខតាមរយះធនាគារ PPCBank បន្តទៀត។

នាយកប្រតិបត្តិ PPCBank បានបន្ថែមថា គម្រោងដោះមីនរបស់ APOPO លើផ្ទៃដីចំនួន ៥ហិចតានេះត្រូវបានសម្អាតបន្ថែមពីលើផ្ទៃដី ២,៤ ហិចតាដែលបានសម្អាតកាលពីឆ្នាំ២០២០ សំដៅផ្តល់នូវការជំរុញដ៏សំខាន់ដល់សេដ្ឋកិច្ចក្នុងស្រុកនៃខេត្តសៀមរាបផងដែរ៕ អត្ថបទ ៖ សេក ឧត្តម