មន្ត្រីជាន់ខ្ពស់អាមេរិក កាលពីថ្ងៃព្រហស្បតិ៍ (ទី១៣ ខែកុម្ភៈ) បានប្រាប់ថា សហរដ្ឋអាមេរិក មិនបានច្រានចោលនូវលទ្ធភាពនៃការក្លាយជាសមាជិករបស់អង្គការណាតូ សម្រាប់អ៊ុយក្រែន ឬការចរចាត្រលប់ទៅព្រំដែនរបស់ប្រទេសនេះ មុនឆ្នាំ២០១៤ នោះឡើយ ដោយសម្ដីនេះផ្ទុយនឹងការអត្ថាធិប្បាយដែលធ្វើឡើងក្នុងសប្តាហ៍នេះដោយរដ្ឋមន្ត្រីការពារជាតិអាមេរិក មុនកិច្ចចរចាសន្តិភាពដែលអាចមាន ដើម្បីបញ្ចប់សង្គ្រាមអ៊ុយក្រែន។

នៅពេលត្រូវបានសួរថា តើសហរដ្ឋអាមេរិកបានច្រានចោលសមាជិកភាពអង្គការណាតូ សម្រាប់អ៊ុយក្រែនហើយមែនទេ បេសកជនរងទទួលបន្ទុកកិច្ចការអ៊ុយក្រែនរបស់ប្រធានាធិបតី លោក Donald Trump គឺលោក John Coale បានឆ្លើយថា៖ «ឥឡូវនេះ វានៅតែស្ថិតក្នុងការពិភាក្សាដដែល»។

ហើយជាមួយគ្នានេះ អំឡុងពេលនិយាយក្នុងបទសម្ភាសន៍ជាមួយសារព័ត៌មាន Reuters នៅទីក្រុង Munich ប្រទេសអាល្លឺម៉ង់ លោកបានបន្ថែមថា លទ្ធភាពនៃការវិលត្រលប់ទៅកាន់ព្រំដែន មុនឆ្នាំ២០១៤ របស់អ៊ុយក្រែន ក៏នៅតែស្ថិតក្នុងការពិភាក្សាដូចគ្នាដែរ។

តែយ៉ាងណាក្ដី កាលពីថ្ងៃទី១២ ខែកុម្ភៈ ដោយប្រាប់សម្ព័ន្ធមិត្តយោធារបស់អ៊ុយក្រែន នៅទីក្រុងប៊្រុចសែល ប្រទេសបែលហ្ស៊ិក រដ្ឋមន្ត្រីការពារជាតិអាមេរិក លោក Pete Hegseth បានផ្ដល់នូវសារផ្សេងថា ការវិលទៅកាន់ព្រំដែនអ៊ុយក្រែន មុនឆ្នាំ២០១៤ គឺមិនពិតនោះទេ ហើយថា សហរដ្ឋអាមេរិកមើលមិនឃើញពីសមាជិកភាពរបស់អង្គការណាតូ សម្រាប់ទីក្រុងគីវ ជាផ្នែកនៃដំណោះស្រាយ ចំពោះសង្គ្រាមអ៊ុយក្រែន ដែលមានរយៈពេលជិត ៣ឆ្នាំនេះ៕