ប្រធានាធិបតីប៉ាណាម៉ា លោក Jose Raul Mulino កាលពីថ្ងៃព្រហស្បតិ៍ (ទី១៣ ខែកុម្ភៈ) បាននិយាយថា សហរដ្ឋអាមេរិកបាននិរទេសមនុស្ស ១១៩នាក់ដែលមានសញ្ជាតិផ្សេងៗគ្នាទៅកាន់ប្រទេសប៉ាណាម៉ា ដែលជាផ្នែកនៃកិច្ចព្រមព្រៀង រវាងរដ្ឋបាលរបស់ប្រធានាធិបតីអាមេរិក លោក Donald Trump និងប្រទេសអាមេរិកកណ្តាល។

លោក Mulino បាននិយាយនៅក្នុងសន្និសីទសារព័ត៌មានថា ជើងហោះហើរដំបូងពីសហរដ្ឋអាមេរិក ដែលដឹកមនុស្សមកពីអាហ្វហ្គានីស្ថាន ចិន ឥណ្ឌា អ៊ីរ៉ង់ នេប៉ាល់ ប៉ាគីស្ថាន ស្រីលង្កា ទួរគី អ៊ូសបេគីស្ថាន និងវៀតណាម បានមកដល់នៅថ្ងៃទី១២ ខែកុម្ភៈ ហើយ ២វ៉ុលទៀត នឹងចុះចតក្នុងពេលឆាប់ៗនេះ។ ជារួម អាមេរិក នឹងបញ្ជូនមនុស្ស ៣៦០នាក់ មកប៉ាណាម៉ា តាមជើងហោះហើរទាំង ៣វ៉ុលនោះ។

មុនពេលបញ្ជូនទៅកាន់ប្រទេសរៀងៗខ្លួន អ្នកនិរទេសនឹងត្រូវផ្ទេរទៅជម្រកក្បែរតំបន់ Darien ជាព្រៃបែងចែកអាមេរិកកណ្តាលពីអាមេរិកខាងត្បូង ដែលជនអន្តោប្រវេសន៍រាប់មិនអស់ឆ្លងកាត់កន្លែងនេះ ក្នុងគោលបំណងធ្វើដំណើរទៅកាន់សហរដ្ឋអាមេរិក។

លោក Mulino បាននិយាយថា៖ «តាមរយៈកម្មវិធីកិច្ចសហប្រតិបត្តិការជាមួយរដ្ឋាភិបាលសហរដ្ឋអាមេរិក កាលពីម្សិលមិញ (ថ្ងៃទី១២ ខែកុម្ភៈ) ជើងហោះហើររបស់កងទ័ពអាកាសសហរដ្ឋអាមេរិក បានមកដល់ដោយមានដឹកមនុស្ស ១១៩នាក់ ដែលមានសញ្ជាតិចម្រុះច្រើនបំផុត នៅលើពិភពលោក»។

ក្រសួងសន្តិសុខមាតុភូមិអាមេរិក មិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយ ពាក់ព័ន្ធនឹងករណីនេះ៕