មន្ត្រីប៉ាឡេស្ទីន បាននិយាយកាលពីថ្ងៃព្រហស្បតិ៍ថា អ្នករងរបួស និងឈឺសរុបចំនួន ៤៥២នាក់ រួមនឹងអ្នកជូនចំនួន ៦២០នាក់ បានចាកចេញពីតំបន់ហ្កាហ្សាស្ទ្រីប ក្នុងរយៈពេល ១២ថ្ងៃ កន្លងទៅនេះ នៅច្រកព្រំដែន Rafah ដែលបានបើកនៅក្រោមកិច្ចព្រមព្រៀងឈប់បាញ់។

លោក Salama Maarouf ប្រធានការិយាល័យប្រព័ន្ធផ្សព្វផ្សាយរបស់រដ្ឋាភិបាល ដែលគ្រប់គ្រងដោយក្រុមហាម៉ាស នៅតំបន់ហ្កាហ្សា បាននិយាយថា «នៅមានអ្នករបួស និងឈឺចំនួន ១៥.000នាក់ នៅហ្កាហ្សា ដែលត្រូវការការជម្លៀសចេញដោយអស់សង្ឃឹម ដើម្បីព្យាបាលនៅបរទេស» ដោយសារតែកង្វះខាតថ្នាំ និងការផ្គត់ផ្គង់វេជ្ជសាស្រ្តយ៉ាងធ្ងន់ធ្ងរ។

ទន្ទឹមនឹងនេះ អាជ្ញាធរសុខាភិបាលនៅតំបន់ហ្កាហ្សា បាននិយាយថា មន្ទីរពេទ្យនៅទូទាំងតំបន់ហ្កាហ្សាស្ទ្រីប បានទទួលសាកសពចំនួន ១៧នាក់ ក្នុងរយៈពេល ២៤ម៉ោង ចុងក្រោយនេះ រួមទាំងជនរងគ្រោះ ១៤ នាក់ ត្រូវបានទាញយកពីគំនរបាក់បែក និង ៣នាក់ បានស្លាប់ នៅក្នុងការវាយប្រហារថ្មីរបស់អ៊ីស្រាអែល។

ក្រសួងបានបញ្ជាក់ថា ជនរងគ្រោះជាច្រើន នៅជាប់ក្រោមគំនរបាក់បែក និងនៅតាមដងផ្លូវ ដោយរថយន្តសង្គ្រោះបន្ទាន់ និងក្រុមការពារជនស៊ីវិល មិនអាចទៅដល់ពួកគេបានទេ ដោយសារការវាយប្រហាររបស់  អ៊ីស្រាអែល នៅតែបន្ត។