យោងតាមរូបភាពវីដេអូឃ្លីបដែលបានបង្ហោះនៅលើបណ្តាញព័ត៌មានសង្គម ស្របពេលដែលក្រុមបះបោរបន្តរុលទៅតំបន់ភាគខាងត្បូងនោះ បានឲ្យដឹងថា ក្រុមឧទ្ទាម M23នៅតំបន់ភាគខាងកើតសាធារណរដ្ឋប្រជាធិបតេយ្យកុងហ្គោ អះអាងថា ពួកគេមានសមត្ថភាពរឹបអូសយកទីក្រុងអាកាសយានដ្ឋានយុទ្ធសាស្រ្តតាមចិត្តចង់របស់ពួកគេ សូម្បីតែនៅថ្ងៃស្អែក ។

នៅក្នុងរូបភាពវីដេអូឃ្លីបដែលត្រូវបានបញ្ជាក់ផ្ទៀងផ្ទាត់ដោយទីភ្នាក់ងារព័ត៌មានរ៉យទ័រកាលពីថ្ងៃព្រហស្បតិ៍ឃើញ បុរសម្នាក់ក្នុងឯកសណ្ឋានយោធា បញ្ជាក់អត្តសញ្ញាណខ្លួនឯងថាជាទាហាន M23 បានអួតអាងពីសមត្ថភាពយោធារបស់ពួកគេ និងផែនការជិតមកដល់របស់ពួកគេ ។

បុរសម្នាក់ដែលនិយាយជាភាសា Swahili ទៅកាន់ស្រ្តីកាន់កាមេរ៉ាម្នាក់ថា ពេលពួកយើងចង់ធ្វើ សូម្បីតែនៅថ្ងៃស្អែក ពួកយើងនឹងអាចដណ្តើមគ្រប់គ្រងភូមិ Kavumu ហើយដល់ពេលនោះ យន្តហោះនឹងលែងអាចហោះហើរបានតទៅទៀត ។

កាលពីខែមុន ក្រុមឧទ្ទាម M23 ដណ្តើមបានគ្រប់គ្រងទីក្រុង Goma ដែលជាទីក្រុងធំបំផុតស្ថិតនៅភាគខាងកើតប្រទេសកុងហ្គោ ។ ចាប់តាំងពីពេលនោះមក ក្រុមចលនាមួយនេះ បានបន្តដំណើររុលទៅភាគខាងត្បូង ធ្វើឲ្យកើតមានក្តីបារម្ភពីវិបត្តិមនុស្សជិតកើតឡើង នៅខេត្ត South Kivu ។

ជម្លោះកំពុងកើតឡើងនេះ បានធ្វើឲ្យមនុស្សរាប់ម៉ឺននាក់ជម្លៀសខ្លួនរួចទៅហើយៗនិងធ្វើឲ្យអាក់ខានដល់ប្រតិបត្តិការជំនួយចាំបាច់នៅក្នុងប្រទេសកុងហ្គោដែលពឹងផ្អែកខ្លាំងលើជំនួយក្រៅប្រទេស ៕