យោងតាមការអះអាងរបស់មូលនិធិការអន្តរជាតិអង្គការសហប្រជាជាតិ(UNICEF) បានឲ្យដឹងថា កុមាររាប់សិបនាក់ដែលជាប់ក្នុងជម្លោះនៅតំបន់ភាគខាងកើតសាធារណរដ្ឋប្រជាធិបតេយ្យកុងហ្គោ បានក្លាយជាកម្មវត្ថុនៃអំពើហិង្សាផ្លូវភេទ រួមទាំងករណីចាប់រំលោភសេពសន្ថវៈជាប្រព័ន្ធដោយក្រុមប្រដាប់អាវុធ ។

ប្រធានប្រតិបត្តិអង្គការ UNICEF លោកស្រី Catherine Russell បានធ្វើការព្រមានថា គោលដៅលើកុមារបានហក់ឡើងខ្ពស់ក្នុងកម្រិតពុំធ្លាប់ដែលមានពីមុនមក ក្នុងរយៈពេលប៉ុន្មានឆ្នាំចុងក្រោយនេះ គឺជាករណីមួយដែលត្រូវការការអំពាវនាវឲ្យបញ្ឈប់បន្ទាន់អំពើហិង្សាមួយនេះ ស្របពេលដែលក្រុមឧទ្ទាម M23គាំទ្រដោយប្រទេសរ៉ា្វន់ដា ពង្រីកកាន់កាប់ទឹកដី ដោយប៉ះទង្គិចជាមួយកងកម្លាំងកុងហ្គោ និងក្រុមជីវពលជាសម្ព័ន្ធមិត្តរបស់រដ្ឋាភិបាល ។

លោកស្រី Russell បាននិយាយនៅក្នុងសេចក្តីថ្លែងការណ៍ថា នៅខេត្ត North Kivu និងខេត្ត South Kivu ពួកយើងទទួលបានរបាយការណ៍ដ៏គួររន្ធត់ចិត្តពីការបំពានធ្ងន់ធ្ងរបំផុតលើកុមារ រួមទាំងការចាប់រំលោភសេពសន្ថវៈ និងទម្រង់ផ្សេងទៀតនៃអំពើហិង្សាផ្លូវភេទ ក្នុងកម្រិតខ្ពស់ជាងពេលណាណាទាំងអស់ដែលពួកយើងបានមើលឃើញក្នុងរយៈពេលប៉ុន្មានឆ្នាំចុងក្រោយនេះ ។

ពាក់ព័ន្ធនឹងការចែករំលែករឿងរ៉ាវពិតរបស់អ្នករស់រានមួយចំនួន លោកស្រី Russell និយាយថា ស្រ្តីជាម្តាយម្នាក់ បានរៀបរាប់ប្រាប់បុគ្គលិករបស់ពួកយើងពីវិធីដែលកូនស្រី ៦នាក់របស់គាត់ ក្នុងនោះកូនស្រីពៅមានអាយុត្រឹម ១២ឆ្នាំប៉ុណ្ណោះ ត្រូវបានចាប់រំលោភជាប្រព័ន្ធដោយក្រុមប្រដាប់អាវុធ ខណៈពេលពួកគេដើរស្វែងរកអាហារ ។

ការចោទប្រកាន់របស់អង្គការ UNICEF បានកើតមានឡើង ពេលដែលជម្លោះនៅក្នុងតំបន់សម្បូរធនធានរ៉ែ បង្ហាញសញ្ញាពុំធូរស្រាល ពេលក្រុមឧទ្ទាម M23ដែលដណ្តើមគ្រប់គ្រងទីក្រុង Goma ស្ថិតក្នុងខេត្ត North Kivu កាលពីខែមុន បានបន្តរុលទៅតំបន់ភាគខាងត្បូងប្រទេសកុងហ្គោ ៕