នៅថ្ងៃសុក្រនេះ ក្រុមជីវពលហាម៉ាស់ប៉ាឡេស្ទីន បានប្រកាសឈ្មោះចំណាប់ថ្នូរអ៊ីស្រាអែល ៣នាក់ ដែលនឹងត្រូវដោះលែងនៅថ្ងៃសៅរ៍ស្អែក ។

ក្រុមហាម៉ាស់ និងក្រុមជីហាដអ៊ីស្លាម និយាយថា ពួកគេនឹងដោះឡែងចំណាប់ថ្នូរឈ្មោះ Iair Horn ចំណាប់ថ្នូរកាត់សាសន៍អាមេរិក-អ៊ីស្រាអែល Sagui Dekel-Chen និងចំណាប់ថ្នូរកូនកាត់រុស្ស៊ី-អ៊ីស្រាអែល Alexandre Sasha Troufanov នៅថ្ងៃសៅរ៍ស្អែក ស្របតាមល័ក្ខន្តិកៈនៅក្នុងកិច្ចព្រមព្រៀងបទឈប់បាញ់ជាមួយអ៊ីស្រាអែល ។

សេចក្តីប្រកាសនេះ បានកើតមានឡើងរយៈពេលប៉ុន្មានថ្ងៃនៃភាពពុំច្បាស់លាស់ ជុំវិញអ្វីថាតើបទឈប់បាញ់ដែលបានព្រមព្រៀងកាលពីខែមុន នឹងត្រូវបន្តឬយ៉ាងណា បន្ទាប់ពីកិច្ចខិតខំប្រឹងប្រែងយ៉ាងតានតឹងពីក្រុមអ្នកសម្របសម្រួលអេហ្ស៊ីប និងកាតា ដើម្បីរក្សាកិច្ចព្រមព្រៀងគាំទ្រដោយសហរដ្ឋអាមេរិកមួយនេះ វិលត្រឡប់មករកផ្លូវត្រូវវិញ ។

សូមបញ្ជាក់ថា បទឈប់បាញ់រយៈពេល ៤២ថ្ងៃ ស្ទើតែបរាជ័យទៅហើយចាប់តាំងពីក្រុមហាម៉ាស់ ប្រកាសពុំបានរំពឹងទុកកាលពីថ្ងៃចន្ទថា ពួកគេនឹងបញ្ឈប់ការដោះលែងចំណាប់ថ្នូរ នាំឲ្យអ៊ីស្រាអែលឆ្លើយតបវិញជាមួយនឹងការគំរាមវិលត្រឡប់មកធ្វើសង្រ្គាមវិញ ។

សេចក្តីថ្លែងការណ៍មួយពីការិយាល័យរបស់នាយករដ្ឋមន្រ្តីអ៊ីស្រាអែលលោក Benjamin Netanyahu បាននិយាយថា អ៊ីស្រាអែលបានទទួលយកបញ្ជីឈ្មោះចំណាប់ថ្នូរ ៣នាក់របស់ក្រុមហាម៉ាស់ ៕