វិមានក្រឹមឡាំង បានឲ្យដឹងនៅថ្ងៃសុក្រ (ទី១៤ ខែកុម្ភៈ) នេះថា ក្រុមប្រទេសទាំង៧ ឬ G7 លែងរួមគ្នាជាប្រទេសដែលមានសេដ្ឋកិច្ចរីកលូតលាស់លឿនបំផុតរបស់ពិភពលោកទៀតហើយ ហើយបានបាត់បង់ភាពសំខាន់ជាច្រើន បន្ទាប់ពីប្រធានាធិបតីអាមេរិក លោក Donald Trump បាននិយាយថា លោកចង់ឲ្យរុស្ស៊ីត្រលប់ទៅចូលរួមជាមួយក្រុមនេះវិញ។

កាលពីថ្ងៃព្រហស្បតិ៍ (ទី១៣ ខែកុម្ភៈ) លោក Trump បាននិយាយថា៖ «ខ្ញុំចង់ឲ្យពួកគេត្រលប់មកវិញ។ ខ្ញុំគិតថា វាជាកំហុស ក្នុងការឲ្យពួកគេចេញ។ សូមក្រឡេកមើល វាមិនមែនជាសំណួរចូលចិត្តរុស្ស៊ី ឬមិនចូលចិត្តរុស្ស៊ីនោះទេ។ វាគឺជា G8»។

គួររំលឹកថា រុស្សីធ្លាប់ជាសមាជិកនៃក្រុម G7 ដែលជាប្រទេសលទ្ធិប្រជាធិបតេយ្យមានឧស្សាហកម្មលូតលាស់ខ្លាំង ដោយពេលនោះគេស្គាល់ថា ជា G8 រហូតទល់នឹងពេលដែលទីក្រុងមូស្គូត្រូវបានដកចេញ បន្ទាប់ពីបានបញ្ចូលជាដែនដីឧបសម្ព័ន្ធនូវតំបន់គ្រីម៉ារបស់អ៊ុយក្រែន ក្នុងឆ្នាំ២០១៤។

នៅពេលសួរត្រូវបានសួរ អំពីការអត្ថាធិប្បាយរបស់លោក Trump អ្នកនាំពាក្យវិមានក្រឹមឡាំងលោក Dmitry Peskov បានប្រាប់សន្និសីទសារព័ត៌មានតាមទូរសព្ទ ដោយនិយាយថា៖ «យើងបាននិយាយម្តងហើយម្តងទៀតថា ក្រុម ដែលឥឡូវនេះត្រូវបានគេហៅថា G7 បានបាត់បង់ភាពសំខាន់ជាច្រើន។ ប្លុកនេះប្រមូលផ្តុំនូវប្រទេសដែលឥឡូវនេះ មិនមែនជាអ្នកនាំមុខទៀតទេ ទាក់ទងនឹងកំណើនកំណើនសេដ្ឋកិច្ច នៅពេលនិយាយអំពីវិស័យផ្សេងៗជាច្រើន»។

លោក Peskov បានបន្ថែមថា៖ «មជ្ឈមណ្ឌលនៃកំណើនសេដ្ឋកិច្ច បានផ្លាស់ប្តូរទៅកាន់តំបន់ផ្សេងទៀតនៃពិភពលោក។ យើងចាប់អារម្មណ៍កាន់តែច្រើន ក្នុងការបន្តការងារស្ថាបនារបស់យើង ក្នុងក្របខ័ណ្ឌនៃក្រុមប្រទេស G20។ វេទិកា ដូចជា G20 នេះ ប្រហែលជាឆ្លុះបញ្ចាំងកាន់តែច្រើនឡើងៗ ក្នុងការជួយជំរុញដល់សេដ្ឋកិច្ចរបស់ពិភពលោក»៕