ពេលដែលលោកបោសសម្អាតគំនរបាក់បែកផ្ទះរងការបំផ្លិចបំផ្លាញរបស់ខ្លួននៅទីក្រុង Jabalia ជនប៉ាឡេស្ទីន Yahya al-Najjar ដែលជានិស្សិតបញ្ចប់ការសិក្សាផ្នែកវិចិត្រសិល្បៈ បានរៀបរាប់រឿងរ៉ាវដែលលោកបានឆ្លងកាត់ អំឡុងសង្រ្គាមបំផ្លិចបំផ្លាញតំបន់ហ្កាហ្សា ។

ស្របពេលដែលការវាយប្រហារ និងការវាយឆ្មក់របស់អ៊ីស្រាអែល បានបំផ្លិចបំផ្លាញទីក្រុងកំណើតរបស់លោក ជនប៉ាឡេស្ទីនវ័យ ២៩ឆ្នាំម្នាក់នេះ និយាយថា លោកព្យាយាមវិលត្រឡប់ទៅផ្ទះវិញជាច្រើនលើកច្រើនសារ ដើម្បីជួសជុលការខូចខាតផ្ទះរបស់លោក រហូតដល់ពេលចុងក្រោយលោកបានវិលត្រឡប់មកវិញប៉ុន្តែលោកពុំបានរកឃើញអ្វីនោះឡើយ ក្រៅពីគំនរបាក់បែកប៉ុណ្ណោះ ។

តំបន់ជាច្រើននៅក្នុងទីក្រុង Jabalia បានក្លាយជាកម្ទេចកម្ទី ក្រោយសង្រ្គាមអស់រយៈពេល ១៥ខែ និងរលកនៃការវាយប្រហារតាមច្រកអាកាស និងការផ្លោងគ្រាប់កាំភ្លើងធំរបស់អ៊ីស្រាអែល ។

ដូចគ្នានឹងជនប៉ាឡេស្ទីដទៃទៀតដែរ លោក al-Najjar សង្ឃឹមថាបទឈប់បាញ់នឹងបន្ត ដើម្បីឲ្យលោកអាចកសាងអនាគតឡើងវិញ ឲ្យលោកសាងសង់ផ្ទះរបស់លោកឡើងវិញ ចាប់ផ្តើមធុរកិច្ច និងបង្កើតគ្រួសារដ៏កក់ក្តៅមួយ ។

គួរឲ្យដឹងថា ភាពមន្ទិលសង្ស័យពីបទឈប់បាញ់ បានកើតមានឡើងក្នុងរយៈពេល ១សប្តាហ៍កន្លងមកនេះ ក្រោយក្រុមហាម៉ាស់ប្រកាសពុំបានរំពឹងទុកកាលពីថ្ងៃចន្ទថា ពួកគេនឹងបញ្ឈប់ការដោះលែងចំណាប់ថ្នូរ នាំឲ្យអ៊ីស្រាអែលឆ្លើយតបវិញជាមួយនឹងការគំរាមវិលត្រឡប់មកធ្វើសង្រ្គាមវិញ ។

ទោះបីជាយ៉ាងណាក៏ដោយ ក្រុមហាម៉ាស់ បានបង្ហាញសញ្ញាកាលពីថ្ងៃព្រហស្បតិ៍ថា វិបត្តិអាចនឹងចៀសផុត បើទោះបីជាក្រោយការចោទប្រកាន់ថាអ៊ីស្រាអែលបំពានបទឈប់បាញ់ក៏ដោយ ហើយនៅថ្ងៃសុក្រនេះ ពួកគេបានបញ្ចេញឈ្មោះចំណាប់ថ្នូរ ៣នាក់ដែលនឹងត្រូវដោះលែងនៅថ្ងៃសៅរ៍ស្អែក ។

ក្រុមហាម៉ាស់ និយាយថា ពួកគេមិនចង់ឲ្យកិច្ចព្រមព្រៀងដួលរលំនោះទេ បើទោះបីជាពួកគេច្រានចោលអ្វីដែលពួកគេចាត់ទុកថាជាភាសាគំរាម និងការបំភិតបំភ័យពីនាយករដ្ឋមន្រ្តីអ៊ីស្រាអែលលោក Benjamin Netanyahu និងប្រធានាធិបតីសហរដ្ឋអាមេរិកលោក Donald Trump ក៏ដោយ ៕