​

រដ្ឋាភិបាលប្រចាំតំបន់នៅទីក្រុងហ្សឺណែវ ប្រទេសស្វីស បានបោះឆ្នោតកាលពីថ្ងៃសុក្រ ទី១៤ ខែកុម្ភៈ ដើម្បីផ្តល់ជំនួយសង្គ្រោះជាង១១លានដុល្លារដល់អង្គការមិនមែនរដ្ឋាភិបាលមានមូលដ្ឋាននៅទីក្រុងរបស់ប្រទេសស្វីស ដែលទទួលរងដោយការកាត់ជំនួយបរទេសរបស់សហរដ្ឋអាមេរិក។

ក្រុមប្រឹក្សាទីក្រុងហ្សឺណែវ បានអនុម័តដោយមានសំឡេងបោះឆ្នោតគាំទ្រ៦០សំឡេង និង៣៣សំឡេងជំទាស់ទៅនឹងសំណើមួយដែលបានធ្វើឡើងកាលពីថ្ងៃពុធសប្តាហ៍នេះដោយសភាតំបន់ ដើម្បីបញ្ចេញប្រាក់ចំនួន១១,១ លានដុល្លារអាមេរិក ជួយដល់អង្គការមិនមែនរដ្ឋាភិបាលដែលរងផលប៉ះពាល់ ដែលផ្តោតជាសំខាន់លើប្រាក់ខែ សម្រាប់រយៈពេលបីខែបន្ទាប់។

ការសម្រេចចិត្តនេះធ្វើឡើងបន្ទាប់ពីប្រធានាធិបតីសហរដ្ឋអាមេរិកលោក Donald Trump នៅថ្ងៃដំបូង នៃការចូលកាន់តំណែងរបស់លោក បានចេញក្រឹត្យមួយដោយបញ្ឈប់ការផ្តល់មូលនិធិជំនួយបរទេសភាគច្រើនរបស់សហរដ្ឋអាមេរិក។

ការសម្រេចនេះ ធ្វើឱ្យមានការខាតបង់រួចទៅហើយនៅក្នុងទីក្រុងហ្សឺណែវ ជាទីតាំងទីស្នាក់ការកណ្តាលអឺរ៉ុបរបស់អង្គការសហប្រជាជាតិ ជាទីតាំងរបស់គណៈកម្មាធិការកាកបាទក្រហមអន្តរជាតិ និងគ្រូពេទ្យគ្មានព្រំដែន ជាមួយនឹងប្រតិបត្តិការជំនួយមនុស្សធម៌នានានៅជុំវិញពិភពលោក។

ទីក្រុងនេះគឺជាទីតាំងរបស់អង្គការអន្តរជាតិប្រហែល៤០ ព្រមទាំងអង្គការមិនមែនរដ្ឋាភិបាលចំនួន៤៧៦ អង្គការ។ អង្គការទាំងនេះភាគច្រើន ពឹងផ្អែកយ៉ាងខ្លាំងលើមូលនិធិរបស់សហរដ្ឋអាមេរិក រួមទាំងការបើកប្រាក់ខែដល់បុគ្គលិករបស់ពួកគេ។