ប្រធានាធិបតីសហរដ្ឋអាមេរិក លោក Donald Trump បានចុះហត្ថលេខាលើក្រឹត្យមួយនៅក្នុងការិយាល័យ Oval Office កាលពីថ្ងៃសុក្រ ទី១៤ ខែកុម្ភៈ ដោយបង្កើតក្រុមប្រឹក្សាថាមពលថ្មី ដឹកនាំដោយរដ្ឋមន្ត្រីក្រសួងមហាផ្ទៃ លោក Doug Burgum ដែលនឹងស្វះស្វែងរកការពង្រីកទិន្នផលប្រេង និងឧស្ម័នរបស់សហរដ្ឋអាមេរិក។ សហរដ្ឋអាមេរិក គឺជាប្រទេសផលិតឥន្ធនៈហ្វូស៊ីលធំបំផុតរបស់ពិភពលោក។

បន្ថែមលើនេះ លោក Trump បាននិយាយថា ផ្ទៃដីជាង២៤២លានហិចតានៃដែនទឹកសហព័ន្ធនៅឆ្នេរសមុទ្រ បច្ចុប្បន្ននេះត្រូវបានបើកចំហរសម្រាប់ការផលិតប្រេង និងឧស្ម័ន បន្ទាប់ពីលោក Biden បានដកវាចេញពីតុ។

កាលពីថ្ងៃសុក្រ រដ្ឋបាលរបស់លោក Trump បាននិយាយថា ខ្លួនបានផ្តល់អាជ្ញាប័ណ្ណនាំចេញឧស្ម័នធម្មជាតិរាវដល់ក្រុមហ៊ុន Commonwealth LNG ក្នុងរដ្ឋល្វីហ្ស៊ីណា(Louisiana) ជាការអនុម័តលើកដំបូងនៃការនាំចេញធនធាន បន្ទាប់ពីអតីតប្រធានាធិបតី លោក Joe Biden បានផ្អាកវាកាលពីដើមឆ្នាំមុន។

លោក Trump បានលុបចោលការបង្អាក់លើការអនុម័តការនាំចេញឧស្ម័នធម្មជាតិរាវ(LNG) នៅល្ងាចថ្ងៃដែលលោកបានចូលកាន់តំណែងលើកទីពីរ កាលពីថ្ងៃទី២០ ខែមករា។