​

មន្ត្រីតំបន់ បាននិយាយកាលពីថ្ងៃសុក្រ ទី១៤ ខែកុម្ភៈ ថា គ្រាប់បែកមួយគ្រាប់ដាក់គោលដៅលើរថយន្តដឹកកម្មករអណ្តូងរ៉ែធ្យូងថ្មនៅភាគនិរតីប្រទេសប៉ាគីស្ថាន បានសម្លាប់មនុស្សយ៉ាងហោចណាស់ ១១ នាក់ និង៦នាក់ផ្សេងទៀតរងរបួស។ 

វេជ្ជបណ្ឌិតនៅមន្ទីរពេទ្យក្នុងតំបន់ បាននិយាយថា អ្នករងរបួសពីរនាក់ស្ថិតក្នុងស្ថានភាពធ្ងន់ធ្ងរ។

លោក Gul Anwar កម្មករអណ្តូងរ៉ែធ្យូងថ្មក្នុងស្រុក និងជាសាច់ញាតិរបស់អ្នករបួសម្នាក់ បានពិពណ៌នាអំពីស្ថានភាពដ៏គ្រោះថ្នាក់នៅក្នុងតំបន់នេះ។ លោក និយាយថា «មនុស្ស មិនអាចធ្វើដំណើរលើផ្លូវនេះបានទេ ព្រោះយើងត្រូវបានវាយប្រហារគ្រប់ពេលវេលា» ដោយលោក Anwar និយាយដោយលើកឡើងពីហានិភ័យថេរនៃការចាប់ជំរិត និងគ្រោះថ្នាក់ផ្សេងៗទៀត។

សាក្សីម្នាក់បានរៀបរាប់ពីរបៀបដែលរថយន្តនៅខាងមុខពួកគេ បានធ្លាក់ចូលទៅក្នុងប្រឡាយទឹកមួយ កន្លែងហើយបានផ្ទុះ បណ្តាលឱ្យមនុស្សស្លាប់ និងរងរបួសច្រើននាក់។ 

យោងតាមមន្ត្រីយោធាម្នាក់ បាននិយាយឱ្យដឹងថា គ្រឿងផ្ទុះកែច្នៃដែលបង្កប់នៅលើចិញ្ចើមផ្លូវ ត្រូវបានបំផ្ទុះ ខណៈរថយន្តដឹកកម្មករ៉ែធ្យូងថ្ម ឆ្លងកាត់។ រថយន្តនេះដឹកកម្មករទៅកាន់អណ្តូងរ៉ែក្នុងតំបន់ Harnai នៃខេត្ត Balochistan ជាកន្លែងដែលប្រទេសប៉ាគីស្ថាន កំពុងប្រយុទ្ធទៅនឹងការបះបោរផ្តាច់ខ្លួន។

គ្មានក្រុមណាមួយចេញមុខអះអាងទទួលខុសត្រូវចំពោះការវាយប្រហារនេះនៅឡើយ។ ស្នងការរងប្រចាំតំបន់ លោក Hazrat Wali Agha បាននិយាយថា កម្មករអណ្តូងរ៉ែចំនួន ១៧នាក់ ស្ថិតនៅលើររថយន្ត នៅពេលដែលគ្រាប់បែកត្រូវបានបំផ្ទុះ។