ប្រធានាធិបតី Donald Trump កាលពីថ្ងៃសុក្រ (ទី១៤ ខែកុម្ភៈ) បានគាំទ្រការប្រកាន់ «ជំហរតឹងតែង» នៅតំបន់ហ្កាហ្សា ជាដែនដីប៉ាឡេស្ទីន ដែលលោកបានស្នើឲ្យមានការកាន់កាប់ដោយសហរដ្ឋអាមេរិក និងជាកន្លែងដែលបទឈប់បាញ់ដ៏ផុយស្រួយ រវាងអ៊ីស្រាអែល និងក្រុមសកម្មប្រយុទ្ធហាម៉ាសប៉ាឡេស្ទីន កំពុងដំណើរការ។

លោក Trump បាននិយាយនៅសប្តាហ៍នេះថា ក្រុមហាម៉ាស គួរតែដោះលែងចំណាប់ថ្នូរអ៊ីស្រាអែលទាំងអស់ នៅតំបន់ហ្កាហ្សា ត្រឹមថ្ងៃត្រង់ថ្ងៃសៅរិ៍ (ទី១៥ ខែកុម្ភៈ) នេះ ឬបើមិនដូច្នោះទេ លោកនឹង «បណ្ដោយឲ្យទិដ្ឋភាពដូចឋាននរកកើតមាននៅតំបន់នេះ»។

លោក Trump បានប្រាប់អ្នកសារព័ត៌មានកាលពីថ្ងៃសុក្រថា៖ «ខ្ញុំមិនដឹងថា នឹងមានអ្វីកើតឡើងនៅថ្ងៃស្អែក (ថ្ងៃសៅរ៍) វេលាម៉ោង ១២ថ្ងៃត្រង់នោះទេ។ ប្រសិនបើខ្ញុំជាអ្នកសម្រេច ខ្ញុំនឹងប្រកាន់ជំហរយ៉ាងតឹងតែងខ្លាំង ប៉ុន្តែខ្ញុំមិនអាចប្រាប់អ្នកពីអ្វីដែលអ៊ីស្រាអែលនឹងធ្វើនោះទេ»។

គួរបញ្ជាក់ថា បទឈប់បាញ់បានចូលជាធរមាន នៅមុនពេលលោក Trump វិលទៅកាន់តំណែងជាប្រធានាធិបតីវិញ នាថ្ងៃទី២០ ខែមករា។ ចំណាប់ថ្នូរអ៊ីស្រាអែលមួយចំនួន ត្រូវបានដោះលែង ដោយក្រុមហាម៉ាស ហើយអ្នកទោសប៉ាឡេស្ទីនត្រូវបានដោះលែងដោយអ៊ីស្រាអែល ចាប់តាំងពីពេលនោះមក៕