រដ្ឋមន្ត្រីការបរទេសចិន លោក Wang Yi កាលពីថ្ងៃសុក្រ (ទី១៤ ខែកុម្ភៈ) បាននិយាយថា ប្រទេសចិនជឿជាក់ថា ភាគីពាក់ព័ន្ធទាំងអស់នៅក្នុងជម្លោះរុស្ស៊ី-អ៊ុយក្រែន គួរតែចូលរួមក្នុងកិច្ចចរចាសន្តិភាពនេះ ដោយបានគូសបញ្ជាក់អំពីតួនាទីរបស់អឺរ៉ុប នៅក្នុងចំណោមភាគីទាំងនេះ បន្ទាប់ពីមានភាពច្របូកច្របល់នៃការផ្ដល់សាររបស់សហរដ្ឋអាមេរិកអំពីរបៀបបញ្ចប់សង្រ្គាម។

អំឡុងថ្លែងនៅឯសន្និសីទសន្តិសុខទីក្រុង Munich ក្នុងប្រទេសអាល្លឺម៉ង់ លោក Wang បានប្រាប់ថា៖ «យើងសង្ឃឹមថា គ្រប់ភាគី និងអ្នកពាក់ព័ន្ធទាំងអស់ ចូលរួមដោយផ្ទាល់នៅក្នុងកិច្ចចរចាសន្តិភាព ក្នុងពេលវេលាដ៏សមស្រប«។

ក្រសួងការបរទេសចិនបានដកស្រង់ប្រសាសន៍របស់លោក Wang ដែលបានលើកឡើងថា៖ «ប្រទេសចិនចាត់ទុកកិច្ចប្រឹងប្រែងទាំងអស់ដែលឧទ្ទិសដល់សន្តិភាពជាសញ្ញាវិជ្ជមាន ក្នុងនោះរួមទាំងការឯកភាពណាមួយដែលសម្រេចបានដោយសហរដ្ឋអាមេរិក និងរុស្ស៊ី ស្ដីពីកិច្ចចរចាសន្តិភាពនេះផងដែរ»។

លោក Wang បានសង្កត់ធ្ងន់ថា៖ «នៅពេលដែលសង្រ្គាមកំពុងកើតឡើង នៅលើដែនដីអឺរ៉ុប វាកាន់តែចាំបាច់ណាស់ដែលអឺរ៉ុបត្រូវដើរតួនាទីរបស់ខ្លួន ដើម្បីស្វែងរកសន្តិភាព រួមគ្នាដោះស្រាយឫសគល់នៃវិបត្តិ ស្វែងរកក្របខ័ណ្ឌសន្តិសុខប្រកបដោយតុល្យភាព ប្រសិទ្ធភាព និងនិរន្តរភាព និងដើម្បីសម្រេចបានសន្តិភាព និងស្ថិរភាពយូរអង្វែង នៅអឺរ៉ុប»។

គួរបញ្ជាក់ថា ប្រធានាធិបតីអាមេរិក លោក Donald Trump បានជជែកជាមួយប្រធានាធិបតីរុស្ស៊ី លោក Vladimir Putin និងលោក Volodymyr Zelenskiy របស់អ៊ុយក្រែន តាមទូរសព្ទ កាលពីថ្ងៃទី១២ ខែកុម្ភៈ ហើយបានប្រគល់ភារកិច្ចឲ្យមន្ត្រីឲ្យចាប់ផ្ដើមចរចា ដោយបន្ថែមថា កិច្ចប្រជុំកំពូលជាមួយលោក Putin នៅប្រទេសអារ៉ាប៊ីសាអ៊ូឌីត ទំនងជាអាចកើតមាន៕