លោក Volodymyr Zelensky បាននិយាយថា លោកមិនចង់ឲ្យគេចងចាំលោកថា ជាប្រធានាធិបតីដែលបានប្រគល់ដែនដីអ៊ុយក្រែនឲ្យទៅរុស្ស៊ីនោះឡើយ។

កាលពីថ្ងៃសុក្រ (ទី១៤ ខែកុម្ភៈ) អំឡុងពេលនិយាយនៅក្នុងបទសម្ភាសន៍ដែលដំណើរការដោយពិធីការនី Francine Lacqua របស់ទូរទស្សន៍ Bloomberg លោក Zelensky បានប្រាប់ថា លោកបានត្រៀមលក្ខណៈចូលរួមជាមួយគំនិតផ្តួចផ្តើមរបស់ប្រធានាធិបតីអាមេរិក លោក Donald Trump ដើម្បីបញ្ចប់សង្រ្គាម នៅអ៊ុយក្រែន ប៉ុន្តែលោកចង់យល់ស្របលើវិធីសាស្រ្តនានាជាមួយសម្ព័ន្ធមិត្តសិន មុនពេលទៅប្រឈមមុខជាមួយលោក Vladimir Putin។

នៅឯសន្និសីទសន្តិសុខទីក្រុង Munich ប្រទេសអាល្លឺម៉ង់លោក Zelensky បានប្រាប់អ្នកចូលរួមស្ដាប់បទសម្ភាសន៍របស់លោកថា៖ «ខ្ញុំមិនចង់ក្លាយជាមនុស្សដែលត្រូវបានប្រវត្តិសាស្ត្រកត់ត្រាថា បានជួយឲ្យលោក Putin កាន់កាប់ប្រទេសរបស់ខ្ញុំនោះទេ»។

គួរបញ្ជាក់ថា លោក Zelensky កំពុងស្ថិតក្រោមសម្ពាធយ៉ាងខ្លាំងក្លាពីសេតវិមានរបស់លោក Trump នាសប្តាហ៍នេះ បន្ទាប់ពីមន្ត្រីជាន់ខ្ពស់របស់សហរដ្ឋអាមេរិក បានប្រាប់ថា វាមិនអាចទៅរួចនោះទេ ក្នុងការចង់បានមកវិញនូវផ្នែកខ្លះរបស់អ៊ុយក្រែនដែលត្រូវបានកាន់កាប់ដោយវិមានក្រឹមឡាំង។ ជាមួយគ្នានេះ លោក Trump ក៏បានលើកឡើងផងដែរឲ្យលោក Zelensky ចាំបាច់ត្រូវប្រកាសរៀបចំការបោះឆ្នោត ដើម្បីចាប់ផ្ដើមអាណត្តិថ្មីរបស់លោក ជាគំនិតដែលបន្ទរតាមសំឡេងនិយាយចេញពីវិមានក្រឹមឡាំង។

យ៉ាងណាក្ដី ខណៈដែលបណ្តាប្រទេស នៅអឺរ៉ុប កំពុងព្យាយាមបង្កើតការឆ្លើយតប ចំពោះការផ្លាស់ប្តូរយ៉ាងខ្លាំងក្លា នៅក្នុងគោលនយោបាយរបស់សហរដ្ឋអាមេរិក នាសប្តាហ៍នេះ មន្ត្រីមួយចំនួន បានលើកឡើងថា ពួកគេគួរតែផ្ដោតលើការយល់ព្រម ជុំវិញការធានាសន្តិសុខ សម្រាប់អ៊ុយក្រែន និងតួនាទីរបស់សហរដ្ឋអាមេរិក មុនពេលពួកគេចាប់ផ្តើមចរចាជាមួយលោក Putin៕