រដ្ឋមន្ត្រីការបរទេសហ្ស៊កដានី កាលពីថ្ងៃសុក្រ (ទី១៤ ខែកុម្ភៈ) បាននិយាយថា ប្រទេសអារ៉ាប់ កំពុងរៀបចំនូវផែនការមួយ ដែលនឹងកសាងតំបន់ហ្កាហ្សាឡើងវិញ ដោយមិនមានការផ្លាស់ទីលំនៅ ធានាសន្តិសុខ និងអភិបាលកិច្ច ស្របពេលបន្ថែមថា ប្រទេសរបស់លោក មិនអាចទទួលយកពលរដ្ឋប៉ាឡេស្ទីនបន្ថែមទៀតបានទេ។

គួរបញ្ជាក់ថា បណ្តាប្រទេសអារ៉ាប់ មានការស្រងាកចិត្ត នៅដើមខែនេះ បន្ទាប់ពីប្រធានាធិបតីអាមេរិក Donald Trump បានប្រកាសផែនការ «យកចេញទាំងអស់» នូវពលរដ្ឋប៉ាឡេស្ទីនពីតំបន់ហ្កាហ្សា និងតាំងទីលំនៅថ្មីឲ្យពួកគេ ដែលភាគច្រើននៅប្រទេសហ្ស៊កដានី និងអេហ្ស៊ីប ជាគំនិតមួយដែលត្រូវបានច្រានចោលភ្លាមៗ ដោយទីក្រុងគែរ និងអាម៉ាន់ ហើយត្រូវបានគេមើលឃើញថា តំបន់ភាគច្រើនមានអស្ថិរភាពខ្លាំងក្លា។

នៅឯសន្និសីទសន្តិសុខទីក្រុង Munich ប្រទេសអាល្លឺម៉ង់ លោក Ayman Safadi បានប្រាប់ថា៖ «គ្រាន់តែចង់ផ្ដល់ចម្លើយឲ្យអ្នកយ៉ាងច្បាស់លាស់ថា ៣៥ភាគរយនៃចំនួនប្រជាជនរបស់យើង គឺជាជនភៀសខ្លួន យើងមិនអាចមានលទ្ធភាពទទួលយកបានទៀតទេ ពោលគឺយើងមិនអាចឲ្យពលរដ្ឋប៉ាឡេស្ទីនចូលមកហ្ស៊កដានីបានទៀតទេ។ ពួកគេមិនចង់ធ្វើដំណើរទៅហ្ស៊កដានីនោះឡើយ ហើយយើងក៏មិនចង់ឲ្យពួកគេចូលមកប្រទេសយើងដែរ»។

ព្រះមហាក្សត្រ Abdullah របស់ប្រទេសហ្ស៊កដានី បានយាងដំណើរទៅកាន់ទីក្រុងវ៉ាស៊ីនតោន កាលពីថ្ងៃទី១១ ខែកុម្ភៈ ជាកន្លែងដែលព្រះអង្គបានលើកឡើងវិញនូវ «ជំហរដ៏រឹងមាំ» របស់ប្រទេសព្រះអង្គប្រឆាំងនឹងផែនការរបស់លោក Trump សម្រាប់តំបន់ហ្កាហ្សា៕