លោក Rafael Grossi ប្រមុខអង្គការឃ្លាំមើលនុយក្លេអ៊ែររបស់អង្គការសហប្រជាជាតិ (UN) កាលពីថ្ងៃសុក្រ (ទី១៤ ខែកុម្ភៈ) បាននិយាយថា ពេលវេលាកាន់តែជិតអស់ហើយ សម្រាប់កិច្ចប្រឹងប្រែងធានាឲ្យបាននូវកិច្ចព្រមព្រៀង ដើម្បីគ្រប់គ្រងកម្មវិធីនុយក្លេអ៊ែររបស់អ៊ីរ៉ង់ ខណៈដែលទីក្រុងតេអេរ៉ង់ បន្តពន្លឿនការបង្កើនសារធាតុអ៊ុយរ៉ាញ៉ូមរបស់ខ្លួនដល់កម្រិតផលិតអាវុធ។

គួរបញ្ជាក់ថា អ៊ីរ៉ង់បានបង្កើនសកម្មភាពនុយក្លេអ៊ែរ ចាប់តាំងពីឆ្នាំ២០១៩ បន្ទាប់ពីប្រធានាធិបតីអាមេរិក លោក Donald Trump ក្នុងអាណត្តិដំបូងរបស់លោក បានបោះបង់ចោលកិច្ចព្រមព្រៀងឆ្នាំ២០១៥ ដែលសម្រេចបានក្រោមការដឹកនាំរបស់លោក Barack Obama។ ដោយការទូតនុយក្លេអ៊ែរត្រូវបានផ្អាក ការចាប់អារម្មណ៍ បានបង្វែរទៅលើលោក Trump និងរបៀបដែលលោកមានបំណងដោះស្រាយកិច្ចការដ៏ស្មុគស្មាញនេះ។

រហូតមកដល់ពេលនេះ មានគោលនយោបាយច្បាស់លាស់តិចតួចណាស់ ជុំវិញបញ្ហានេះ ហើយអ៊ីរ៉ង់ បានបន្តជំរុញកម្មវិធីនុយក្លេអ៊ែររបស់ខ្លួន ដោយពន្លឿនការចម្រាញ់សារធាតុអ៊ុយរ៉ាញ៉ូមសុទ្ធរហូតដល់ ៦០ភាគរយ ពោលគឺកៀកនឹងកម្រិតប្រហែល ៩០ភាគរយដែលជាតម្រូវការផលិតអាវុធ។

អំឡុងពេលផ្ដល់បទសម្ភាសន៍ នៅខាងក្រៅសន្និសីទសន្តិសុខទីក្រុង Munich ក្នុងប្រទេសអាល្លឺម៉ង់ ប្រមុខទីភ្នាក់ងារថាមពលបរមាណូអន្តរជាតិ (IAEA) លោក Grossi បាននិយាយថា៖ «ខ្ញុំគិតថា យើងមានពេលវេលាកាន់តែតិចទៅៗហើយ ប៉ុន្តែវាមិនមែនមានន័យថា យើងមិនអាចសម្រេចវាឲ្យបានលឿននោះទេ»។

លោកបានបន្ថែមថា៖ «IAEA ស្ថិតនៅទីនោះ ហើយមានព័ត៌មាន និងរឿងរ៉ាវលម្អិតពាក់ព័ន្ធទាំងអស់ ប៉ុន្តែនៅពេលនិយាយអំពីគោលនយោបាយ វាអាស្រ័យលើប្រទេសនានា»។

លោក Grossi បានបញ្ជាក់ថា ប្រទេសអ៊ីរ៉ង់កំពុងស្ថិតក្នុងដំណើរការបង្កើនសារធាតុអ៊ុយរ៉ាញ៉ូម ៧ដងជារៀងរាល់ខែ ដោយបានចម្រាញ់ដល់កម្រិត ៦០ភាគរយ៕