រដ្ឋ California ភាគខាងត្បូងរបស់សហរដ្ឋអាមេរិក កំពុងប្រឈមជាមួយបំណាក់ភក់ និងទឹកជំនន់បន្ថែមទៀត កាលពីថ្ងៃសុក្រ (ទី១៤ ខែកុម្ភៈ) ជាពិសេសនៅតំបន់ដែលត្រូវបានឆាបឆេះដោយចំហេះព្រៃ កាលពីខែមុន បើទោះបីជាភ្លៀងធ្លាក់ខ្លាំងដែលបានធ្វើឲ្យតំបន់ទីក្រុង Los Angeles មានសុទ្ធតែទឹក បានធូរស្រាលបណ្ដើរៗ នៅសប្តាហ៍នេះក៏ដោយ។

ភ្លៀងធ្លាក់ខ្លាំងយ៉ាងជោកជាំរយៈពេល ៣ថ្ងៃ ទឹកជំនន់ និងបំណាក់ភក់ បានបង្ខំឲ្យមានការជម្លៀស និងការបិទផ្លូវ ក្នុងនោះរួមទាំងផ្នែកនៃផ្លូវហាយវេ Pacific Coast Highway រវាងទីក្រុង Malibu និង Pacific Palisades ផងដែរ។

សង្កាត់ Pacific Palisades របស់ទីក្រុង Los Angeles រួមជាមួយនឹងតំបន់ Altadena នៅផ្នែកខាងកើត គឺជាទីតាំងនៃគ្រោះអគ្គិភ័យដ៏អាក្រក់បំផុត កាលពីខែមករា។ យ៉ាងហោចណាស់មនុស្ស ២៩នាក់ បានបាត់បង់ជីវិត នៅក្នុងចំហេះដែលបានបង្កការខូចខាត ឬបំផ្លិចបំផ្លាញរចនាសម្ព័ន្ធជាង ១៦.០០០។

សេវាកម្មអាកាសធាតុជាតិ បានឲ្យដឹងថា កន្លែងមួយចំនួន នៅក្នុងតំបន់ Los Angeles County បានកត់ត្រាទឹកភ្លៀងកម្រិតលើសពី ៥អ៊ីញ (១៣សង់ទីម៉ែត្រ) នៅសប្តាហ៍នេះ ខណៈដែលកម្រិតជិត ៣អ៊ីញ បានធ្លាក់នៅក្នុងទីក្រុង Los Angeles និង Beverly Hills។

វីដេអូដែលត្រូវបានបង្ហោះនៅលើបណ្ដាញសង្គម បានបង្ហាញឲ្យឃើញពីរថយន្តរបស់អ្នកពន្លត់អគ្គិភ័យ លិចក្នុងទឹក បន្ទាប់ពីទឹកជំនន់យ៉ាងគំហុកភ្លាមៗ បានហូរនាំចេញពីផ្លូវហាយវេ Pacific Coast Highway។ សារព័ត៌មាន ក្នុងស្រុកបានរាយការណ៍ថា អ្នកពន្លត់អគ្គិភ័យបានរត់ចេញដោយមានរបួសស្រាល។ ហើយរូបថតដែលបង្ហោះតាមប្រព័ន្ធអ៊ីនធឺណិត បានបង្ហាញពីរថយន្តដែលកប់ក្នុងភក់រហូតដល់បង្អួច នៅតំបន់ Pacific Palisades៕