អគ្គលេខាធិការអង្គការសហប្រជាជាតិ លោក Antonio Guterres បានជំរុញឲ្យមានការសន្ទនាគ្នា រវាងភាគីជម្លោះ នៅភាគខាងកើតកុងហ្គោ នាថ្ងៃសៅរ៍ (ទី១៥ ខែកុម្ភៈ) នេះ ពោលគឺប៉ុន្មានម៉ោងបន្ទាប់ពីក្រុមឧទ្ទាម M23 ដែលគាំទ្រដោយប្រទេសរ៉្វាន់ដា បានចូលទៅជាយក្រុងភាគខាងជើងនៃរដ្ឋធានីខេត្ត Bukavu។

ខណៈដែលការភ័យខ្លាចមានកាន់តែខ្លាំងឡើងៗ ដែលថា ការប្រយុទ្ធគ្នាអាចឈានដល់ជម្លោះក្នុងតំបន់នៅទីក្រុង Addis Ababa របស់ប្រទេសអេត្យូពី លោក Guterres បានប្រាប់កិច្ចប្រជុំកំពូលរបស់សហភាពអាហ្រ្វិក (AU) ថា៖ «មិនមានដំណោះស្រាយដោយកម្លាំងយោធានោះទេ។ ការជាប់គាំងត្រូវតែបញ្ចប់ ហើយការសន្ទនាត្រូវតែចាប់ផ្តើម» ។

គួរបញ្ជាក់ថា ក្រុមឧទ្ទាម បាន និងកំពុងរុលទៅភាគខាងត្បូងឆ្ពោះទៅកាន់ទីក្រុង Bukavu ដែលជាទីក្រុងធំទី២ នៅភាគខាងកើតនៃសាធារណរដ្ឋប្រជាធិបតេយ្យកុងហ្គោ ចាប់តាំងពីពួកគេបានដណ្តើមកាន់កាប់ទីក្រុង Goma ដែលជាទីក្រុងធំជាងគេបំផុតកាលពីចុងខែមុន។

មេដឹកនាំមកពីប្លុកតំបន់អាហ្រ្វិកខាងកើត និងខាងត្បូង កាលពីចុងសប្តាហ៍មុន បានជំរុញឲ្យភាគីទាំងអស់ធ្វើកិច្ចចរចាដោយផ្ទាល់ ប៉ុន្តែប្រធានាធិបតីកុងហ្គោ លោក Felix Tshisekedi បានបដិសេធម្តងហើយម្តងទៀតមិនជជែកដោយផ្ទាល់ជាមួយក្រុម M23 នោះឡើយ ហើយបានលុបចោលការបង្ហាញខ្លួនរបស់លោកនៅក្នុងកិច្ចប្រជុំកំពូល AU ដោយបញ្ជូននាយករដ្ឋមន្ត្រីរបស់លោកទៅធ្វើជាតំណាងឲ្យកុងហ្គោ៕