មន្ត្រីពេទ្យម្នាក់បានប្រាប់សារព័ត៌មាន AFP ថា មនុស្សយ៉ាងហោចណាស់ ១៥ នាក់បានស្លាប់ក្នុងអំឡុងពេលប្រជ្រៀតជាន់គ្នានៅស្ថានីយ៍រថភ្លើងក្នុងរដ្ឋធានីប្រទេសឥណ្ឌាកាលពីល្ងាចថ្ងៃសៅរ៍ ១៥ កុម្ភៈ នៅពេលហ្វូងមនុស្សកំពុងឡើងជិះរថភ្លើងទៅកាន់កន្លែងជួបជុំសាសនាដ៏ធំបំផុតរបស់ពិភពលោក។

ពិធីបុណ្យសាសនាហិណ្ឌូ មហា កុម្ភ មេឡា (Maha Kumbh mela) បានទាក់ទាញហិណ្ឌូសាសនិករាប់សិបលាននាក់រៀងរាល់ ១២ ឆ្នាំម្ដងទៅកាន់ភាគខាងជើងទីក្រុង Prayagraj ហើយមានប្រវត្តិនៃគ្រោះមហន្តរាយទាក់ទងនឹងហ្វូងមនុស្ស រួមទាំងហេតុការណ៍មួយកាលពីខែមុននៅពេលមនុស្សយ៉ាងហោចណាស់ ៣០នាក់បានស្លាប់ក្នុងការប្រជ្រៀតជាន់គ្នាមួយទៀតនៅឯចំណុចប្រសព្វដ៏បរិសុទ្ធនៃ ទន្លេ គង្គារ (Gange) ទន្លេ Yamuna និងទន្លេ Saraswati ។      

ការប្រញាប់ប្រញាល់នៅស្ថានីយ៍រថភ្លើងក្នុងទីក្រុង New Delhi ទំនងកើតឡើងកាលពីថ្ងៃសៅរ៍ ខណៈ ហ្វូងមនុស្សព្យាយាមឡើងរថភ្លើងដើម្បីបានទៅចូលរួមព្រឹត្តិការណ៍កំពុងបន្ត ដែលនឹងបញ្ចប់នៅថ្ងៃទី ២៦ ខែកុម្ភៈ។

លោកវេជ្ជបណ្ឌិត Ritu Saxena អគ្គនាយករងផ្នែកវេជ្ជសាស្ត្រនៃមន្ទីរពេទ្យ Lok Nayak ក្នុងទីក្រុង New Delhi បានប្រាប់សារព័ត៌មាន AFP ថាលោកអាចបញ្ជាក់ការស្លាប់របស់មនុស្សចំនួន ១៥ នាក់នៅមន្ទីរពេទ្យ៕