ការិយាល័យរបស់ប្រធានាធិបតីបារាំង លោក Emmanuel Macron បាននិយាយថា មេដឹកនាំបារាំងរូបនេះនឹងធ្វើជាម្ចាស់ផ្ទះទទួលក្រុមមេដឹកនាំមកពីបណ្តាប្រទេសសំខាន់ៗនៅអឺរ៉ុបនៅថ្ងៃចន្ទទី ១៧ ខែកុម្ភៈ សប្ដាហ៍នេះ ដើម្បីពិភាក្សាពីបញ្ហាសន្តិសុខរបស់ទ្វីបនេះ ស្របពេលមានការព្រួយបារម្ភកាន់តែខ្លាំងលើកិច្ចខិតខំប្រឹងប្រែងរបស់សហរដ្ឋអាមេរិកក្នុងការបញ្ចប់សង្រ្គាមអ៊ុយក្រែន។ 

ប្រធានាធិបតីអាមេរិកលោក Donald Trump បានធ្វើឲ្យអ៊ុយក្រែន និងក្រុមប្រទេសនៅអឺរ៉ុបដែលជាអ្នកគាំទ្រអ៊ុយក្រែន មានការភ្ញាក់ផ្អើលកាលពីសប្តាហ៍មុនដោយចាប់ផ្តើមពិភាក្សាអំពីការវាយលុករបស់រុស្ស៊ី ក្នុងការសន្ទនាតាមទូរស័ព្ទជាមួយសមភាគីរុស្ស៊ីលោក Vladimir Putin ។

រដ្ឋបាលថ្មីរបស់សហរដ្ឋអាមេរិក ក៏បានព្រមានសម្ព័ន្ធមិត្តណាតូរបស់ខ្លួនផងដែរថា អឺរ៉ុបនឹងលែងជាអាទិភាពផ្នែកសន្តិសុខរបស់ខ្លួនទៀតហើយ ហើយអាចផ្លាស់ប្តូរកម្លាំងផងដែរ ទន្ទឹមនឹងមហាអំណាចពិភពលោកមួយនេះងាកទៅផ្តោតលើការលូតលាស់ខ្លាំងរបស់ប្រទេសចិនវិញ។ 

ការិយាល័យរបស់លោក Macron បាននិយាយកាលពីថ្ងៃអាទិត្យថា ក្រុមមេដឹកនាំអឺរ៉ុបនឹងជួបប្រជុំគ្នានៅទីក្រុងប៉ារីសនៅរសៀលថ្ងៃចន្ទសប្ដាហ៍នេះ ដើម្បីពិភាក្សាអំពី "ស្ថានភាពនៅអ៊ុយក្រែន" និង "សន្តិសុខនៅអឺរ៉ុប" ។ 

ប្រភពខាងលើបន្តថាប្រមុខរដ្ឋាភិបាលនៃប្រទេសអាល្លឺម៉ង់ ចក្រភពអង់គ្លេស អ៊ីតាលី ប៉ូឡូញ អេស្ប៉ាញ ហូឡង់ និងដាណឺម៉ាក នឹងចូលរួមកិច្ចប្រជុំក្រៅផ្លូវការនេះ៕