រដ្ឋមន្ត្រីការបរទេសអាមេរិក លោក Marco Rubio កាលពីថ្ងៃអាទិត្យ (១៦ កុម្ភៈ) បាននិយាយថា អ៊ុយក្រែន និងអឺរ៉ុប នឹងជាផ្នែកនៃ "កិច្ចចរចាពិតប្រាកដណាមួយ" ដើម្បីបញ្ចប់សង្រ្គាមជាមួយទីក្រុងមូស្គូ ដោយផ្ដល់សញ្ញាថា កិច្ចពិភាក្សារបស់អាមេរិក ជាមួយរុស្ស៊ីក្នុងសប្តាហ៍នេះ ជាឱកាសមួយដើម្បីពិនិត្យមើលថា តើប្រធានាធិបតីរុស្ស៊ី លោក Vladimir Putin មានភាពម៉ឺងម៉ាត់ប៉ុណ្ណាចំពោះសន្តិភាព។

ប្រមុខការទូតរបស់អាមេរិករូបនេះហាក់មិនអើពើលើក្តីបារម្ភរបស់អឺរ៉ុប ចំពោះការកាត់ចេញពីកិច្ចចរចាដំបូងរវាងរុស្ស៊ី និងអាមេរិក ដែលគ្រោងនឹងធ្វើឡើងនៅអារ៉ាប៊ីសាអ៊ូឌីត ប៉ុន្មានថ្ងៃខាងមុខនេះ។ នៅក្នុងបទសម្ភាសន៍ជាមួយសារព័ត៌មាន CBS លោក Rubio លើកឡើងថា ដំណើរការចរចាមិនទាន់ចាប់ផ្តើមដោយស្មោះទេ ហើយប្រសិនបើកិច្ចចរចារមានវឌ្ឍនភាព នោះអ៊ុយក្រែន និងប្រទេសអឺរ៉ុបផ្សេងទៀតនឹងត្រូវបាននាំចូលទៅក្នុងកិច្ចចរចានោះ។

ក្រុមមន្ត្រីអឺរ៉ុបមានការភ្ញាក់ផ្អើល និងបារម្ភចំពោះចំណាត់ការរបស់រដ្ឋបាលលោកប្រធានាធិបតីអាមេរិក Donald Trump លើរឿងអ៊ុយក្រែន រុស្ស៊ី និងវិស័យការពារជាតិអឺរ៉ុបក្នុងប៉ុន្មានថ្ងៃថ្មីៗនេះ។ ការភ័យខ្លាចចម្បងគឺថា ពួកគេមិនអាចពឹងផ្អែកលើការការពារយោធារបស់អាមេរិកបានទៀត ហើយថាលោក Trump នឹងព្យាយាមចុះហត្ថលេខាលើកិច្ចព្រមព្រៀងសន្តិភាពអ៊ុយក្រែន ជាមួយលោក Putin ដែលបំផ្លាញទីក្រុងគីវ និងសន្តិសុខទ្វីបអឺរ៉ុបកាន់តែទូលំទូលាយ។

ទន្ទឹមនឹងនេះ កាលពីព្រឹកថ្ងៃអាទិត្យ ទីភ្នាក់ងារសារព័ត៌មានរ៉យទ័ររាយការណ៍ថា មន្ត្រីអាមេរិកបានប្រគល់កម្រងសំណួរមួយទៅកាន់មន្ត្រីអឺរ៉ុប ដែលបានសាកសួរក្នុងចំណោមរឿងផ្សេងទៀតថា តើមានទាហានប៉ុន្មាននាក់ ដែលពួកគេអាចចូលរួមចំណែកក្នុងការអនុវត្តកិច្ចព្រមព្រៀងសន្តិភាពរវាងអ៊ុយក្រែន និងរុស្ស៊ី។ គេមិនទាន់ច្បាស់ទេថាកម្រងសំណួរនោះមានន័យបែបណា៕