បើទោះបីក្រុមក្បាលរឹងជ្រុលនិយមមួយក្តាប់តូចនៅតែចិញ្ចឹមចិត្តវាយប្រហារមកលើរាជរដ្ឋាភិបាលនិងក្រុមគ្រួសាររបស់សម្តេចតាមរយៈឧបាយកលពិសពុលដ៏ខ្មៅកខ្វក់នានា ប៉ុន្តែបេក្ខជនជាក្រុមប្រឹក្សា សមាជិក សមាជិកគណបក្សប្រឆាំងនៅតាមមូលខេត្ត រាជធានី ខេត្ត ក្រុង ស្រុកខណ្ឌទូទាំងប្រទេសបានក្លាយជាចលនាផ្តាច់ខ្លួនដូចទឹកបាក់ទំនប់ដោយសុំចូលមករួមរស់ជាមួយគណបក្សប្រជាជនកម្ពុជា។
ជាក់ស្តែងកាលពីម្សិលមិញនេះ តាមប្រភពតេឡេក្រាមផ្លូវការរបស់សម្តេចតេជោ ហ៊ុន សែន ប្រធានព្រឹទ្ធសភា និងជាប្រធានគណបក្សប្រជាជនកម្ពុជាត្រូវបានគេមើលឃើញមានបេក្ខជនជាក្រុមប្រឹក្សាគណបក្សភ្លើងទៀនឃុំកំពង់អុស ស្រុកជលគិរី ខេត្តកំពង់ឆ្នាំងចំនួន១០រូប សកម្មជនគណបក្សភ្លើងទៀនភូមិខ្នាច ឃុំគុស ស្រុកត្រាំកក់ ខេត្តតាកែវចំនួន៦រូប បានគោរពស្នើសម្តេចតេជោ ហ៊ុន សែន សុំចូលមករួមរស់ជាមួយគណបក្សប្រជាជនកម្ពុជាវិញ។
ក្នុងការគោរពស្នើសុំនេះ ពួកគាត់បានបង្ហាញអំពីការដែលបានសម្រេចចាកចេញពីបក្សប្រឆាំងមករួមរស់ជាមួយគណបក្សប្រជាជនកម្ពុជាវិញនេះដោយសារតែអស់ជំនឿលើគោលនយោបាយ និងការដឹកនាំរបស់គណបក្សខ្លួនដែលជានិច្ចកាលតែងតែញុះញង់លាបពណ៌រាជរដ្ឋាភិបាលបង្កអស្ថិរភាព ដើម្បីតែការផ្តួលរំលំរាជរដ្ឋាភិបាលដែលមិនបានគិតអំពីសេចក្តីសុខរបស់ពលរដ្ឋ និងផលប្រយោជន៍ជាតិជាធំសូម្បីតែបន្តិច។
សូមបញ្ជាក់ថា ចលនាផ្តាច់ខ្លួនរបស់មន្ត្រីថ្នាក់ដឹកនាំ សកម្មជន សមាជិក សមាជិការបស់បក្សប្រឆាំងសុំចូលមករួមរស់ជាមួយគណបក្សប្រជាជនកម្ពុជាបើគិតចាប់តាំងពីក្រោយការបោះឆ្នោតឆ្នាំ២០១៨មកមានរហូតដល់រាប់ម៉ឺននាក់។នេះបើតាមឯកឧត្តម សុខ ឥសាន សមាជិកព្រឹទ្ធសភា និងជាអ្នកនាំពាក្យរបស់គណបក្សប្រជាជនកម្ពុជាបានឱ្យBTV News ដឹងកាលពីពេលកន្លងមកនេះ៕ អត្ថបទ៖ មុត សុទ្ធ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
