ប្រមុខការទូតសហរដ្ឋអាមេរិកលោក ម៉ាកូ រ៉ូប៊ីយ៉ូ (Marco Rubio) និងនាយករដ្ឋមន្ត្រីអ៊ីស្រាអែល លោក Benjamin Netanyahu បានបង្ហាញការរួបរួមកាលពីថ្ងៃអាទិត្យ១៦ កុម្ភៈ ប្រឆាំងនឹងសត្រូវរួមរបស់ខ្លួន ដោយគំរាមកម្ទេចក្រុមហាម៉ាស និងប្រឆាំងប្រទេសអ៊ីរ៉ង់។

ការសន្យានេះបានកើតឡើងក្នុងអំឡុងពេលថ្លែងសុន្ទរកថារួមគ្នាទៅកាន់ក្រុមអ្នកសារព័ត៌មានក្នុងទីក្រុងហ្សេរុយសាឡឹម ជាទីដែលលោក Rubio បានចាប់ផ្តើមដំណើរនៅមជ្ឈិមបូព៌ាជាលើកដំបូងក្នុងនាមជារដ្ឋមន្ត្រីការបរទេសក្នុងរដ្ឋបាលថ្មីរបស់លោកប្រធានាធិបតី Donald Trump ។

លោក Rubio បាននិយាយអំពីក្រុមអ៊ីស្លាមនិយមប៉ាឡេស្ទីន ដែលបានប្រយុទ្ធជាមួយអ៊ីស្រាអែលអស់រយៈពេលជាង ១៥ខែនៅហ្កាហ្សារហូតដល់បទឈប់បាញ់ដ៏ផុយស្រួយបានចូលជាធរមាននៅថ្ងៃទី១៩ ខែមករា ២០២៥ ថា ក្រុមហាម៉ាស មិនអាចបន្តជាយោធា ឬកងកម្លាំងរដ្ឋាភិបាលបានទេ ពួកគេត្រូវតែត្រូវបានលុបបំបាត់។ 

លោក Netanyahu បាននិយាយថា សម្ព័ន្ធមិត្តទាំងពីរមាន "យុទ្ធសាស្ត្ររួម" ហើយថា ផែនការកម្ទេចក្រុមនេះនឹងត្រូវធ្វើឡើង ប្រសិនបើចំណាប់ខ្មាំងទាំងអស់ដែលនៅតែជាប់ឃុំឃាំងដោយក្រុមសកម្មប្រយុទ្ធនៅក្នុងតំបន់ហ្កាហ្សា មិនត្រូវបានដោះលែង។

ការអត្ថាធិប្បាយទាំងនេះបានធ្វើឡើងមួយថ្ងៃបន្ទាប់ពីក្រុមហាម៉ាស បានដោះលែងចំណាប់ខ្មាំងជនជាតិអ៊ីស្រាអែលបីនាក់ជាថ្នូរនឹងអ្នកទោសប៉ាឡេស្ទីនចំនួន ៣៦៩នាក់ជាការដោះដូរលើកទី៦ក្រោមកិច្ចព្រមព្រៀងឈប់បាញ់ដែលសហរដ្ឋអាមេរិកបានជួយសម្របសម្រួលជាមួយកាតា និងអេហ្ស៊ីប៕