ប្រេសិតមជ្ឈិមបូព៌ារបស់សហរដ្ឋអាមេរិក លោក Steve Witkoff បាននិយាយកាលពីថ្ងៃអាទិត្យ (១៦ កុម្ភៈ) ថា កិច្ចពិភាក្សាដំណាក់កាលទី២ នៃកិច្ចព្រមព្រៀងឈប់បាញ់រវាងអ៊ីស្រាអែល និងក្រុមសកម្មប្រយុទ្ធប៉ាឡេស្ទីន ហាម៉ាស នឹងបន្តនៅសប្តាហ៍នេះ "នៅទីតាំងដែលត្រូវកំណត់" ដើម្បីរកវិធីសាស្រ្តឈានដល់សេចក្ដីបញ្ចប់ប្រកបដោយជោគជ័យ។

លោក Witkoff បានប្រាប់ទូរទស្សន៍ Fox News ថា លោកបានពិភាក្សាតាមទូរសព្ទ "ប្រកបដោយផលិតភាព និងស្ថាបនា" កាលពីថ្ងៃអាទិត្យ ជាមួយនាយករដ្ឋមន្ត្រីអ៊ីស្រាអែល លោក Benjamin Netanyahu លោកនាយករដ្ឋមន្រ្តីកាតា Sheikh Mohammed bin Abdulrahman Al Thani និងនាយកចារកម្មសម្ងាត់របស់អេហ្ស៊ីប។

លោក Witkoff បានប្រាប់ថា ពួកគេបានពិភាក្សាពី "កិច្ចចរចាបន្តបន្ទាប់គ្នានៃដំណាក់កាលទី២ ការកំណត់ជំហរទាំងសងខាងលើបញ្ហាសព្វថ្ងៃនេះ ហើយបន្ទាប់មកបន្តការពិភាក្សានៅសប្តាហ៍នេះនៅទីតាំងដែលត្រូវកំណត់ ពីមធ្យោបាយដែលអាចឈានដល់ការបញ្ចប់ដំណាក់កាលទី២ ដោយជោគជ័យ"។

ការលើកឡើងរបស់បេសកជនអាមេរិករូបនេះ ធ្វើឡើងស្របពេលដែលអ៊ីស្រាអែល បានទទួលការដឹកជញ្ជូនគ្រាប់បែកធុនធ្ងន់ពីអាមេរិក បន្ទាប់ពីមានកង្វល់ជាច្រើនថ្ងៃថា តើបទឈប់បាញ់ដ៏ផុយស្រួយនៅដែនដីហ្កាហ្សា ដែលបានព្រមព្រៀងកាលពីខែមុន នឹងអាចដំណើរការដោយរលូនឬយ៉ាងណា បន្ទាប់ពីភាគីជម្លោះទាំងពីរបានចោទដាក់គ្នាទៅមកថាបានរំលោភលើលក្ខខណ្ឌនៃកិច្ចព្រមព្រៀង៕