ក្រសួងការពារជាតិអ៊ីស្រាអែល បាននិយាយកាលពីថ្ងៃអាទិត្យ (១៦ កុម្ភៈ) ថា អ៊ីស្រាអែល បានទទួលការដឹកជញ្ជូនគ្រាប់បែកធុនធ្ងន់ប្រភេទ MK-84 ពីសហរដ្ឋអាមេរិក បន្ទាប់ពីប្រធានាធិបតីអាមេរិក លោក Donald Trump បានដកការរារាំងដែលបានដាក់លើការនាំចេញអាវុធនេះ ដោយរដ្ឋបាលរបស់លោកអតីតប្រធានាធិបតី Joe Biden ។

ថ្លែងទៅកាន់អ្នកសារព័ត៌មានកាលពីថ្ងៃអាទិត្យ លោក Trump បាននិយាយថា លោកបានដកការរារាំងរបស់លោក Biden លើការនាំចេញគ្រាប់បែកទៅកាន់អ៊ីស្រាអែល បើទោះបីជាមានកិច្ចព្រមព្រៀងបទឈប់បាញ់ក៏ដោយ ដោយសារតែលោកជឿជាក់លើ "សន្តិភាពតាមរយៈកម្លាំង"។

MK-84 គឺជាគ្រាប់បែកទម្ងន់ ២.០០០ផោន (៩០៧ គីឡូក្រាម) ដែលមិនមានប្រព័ន្ធទូរបញ្ជា ហើយគ្រាប់បែកប្រភេទនេះអាចវាយទម្លុះបេតុង និងដែកក្រាស់ជាចម្រៀកៗ ដោយបង្កើតបានជាកាំផ្ទុះធំទូលាយ។ អតីតរដ្ឋបាលលោក Biden បានបដិសេធមិនបញ្ជូនគ្រាប់បែកប្រភេទនេះទៅឱ្យអ៊ីស្រាអែល ដោយសារក្ដីបារម្ភពីផលប៉ះពាល់លើទីតាំងដែលមានប្រជាជនរស់នៅច្រើននៅតំបន់ហ្កាហ្សាស្ទ្រីប។

ការដឹកជញ្ជូនអាវុធនេះបានកើតឡើងបន្ទាប់ពីមានកង្វល់ជាច្រើនថ្ងៃថា តើបទឈប់បាញ់ដ៏ផុយស្រួយនៅដែនដីហ្កាហ្សា ដែលបានព្រមព្រៀងកាលពីខែមុន នឹងអាចដំណើរការដោយរលូនឬយ៉ាងណា បន្ទាប់ពីភាគីជម្លោះទាំងពីរបានចោទដាក់គ្នាទៅមកថាបានរំលោភលើលក្ខខណ្ឌនៃកិច្ចព្រមព្រៀងបញ្ឈប់ការប្រយុទ្ធគ្នា ក្នុងការអនុញ្ញាតឱ្យមានការដោះដូរចំណាប់ថ្នូរដែលឃុំខ្លួននៅហ្កាហ្សា ដោះដូរនឹងអ្នកទោសប៉ាឡេស្ទីន និងអ្នកជាប់ឃុំនៅក្នុងពន្ធនាគារអ៊ីស្រាអែល៕