យោធាចិន នៅថ្ងៃចន្ទ (១៧ កុម្ភៈ) នេះ បានថ្កោលទោសការបើកនាវាចម្បាំងរបស់កាណាដា ឆ្លងកាត់ច្រកសមុទ្រតៃវ៉ាន់ដ៏រសើប ដោយនិយាយថា កងកម្លាំងដែនអាកាស និងកងទ័ពជើងទឹករបស់ខ្លួនបានត្រួតពិនិត្យ និងព្រមាននាវានោះ ដែលជាបេសកកម្មមួយបានកើតឡើងតែប៉ុន្មានថ្ងៃប៉ុណ្ណោះបន្ទាប់ពីនាវាកងទ័ពជើងទឹកសហរដ្ឋអាមេរិក បានធ្វើបេសកកម្មស្រដៀងគ្នានេះ។

កងទ័ពជើងទឹកអាមេរិក ហើយម្តងម្កាលមាននាវាមកពីប្រទេសសម្ព័ន្ធមិត្តដូចជាកាណាដា អង់គ្លេស និងបារាំង បានបើកឆ្លងកាត់ច្រកសមុទ្រនោះប្រហែលមួយខែម្តង។ ចិន ដែលអះអាងសិទ្ធិលើកោះតៃវ៉ាន់ បាននិយាយថា ផ្លូវទឹកយុទ្ធសាស្ត្រនោះជាកម្មសិទ្ធិរបស់ខ្លួន។

បញ្ជាការភាគខាងកើតរបស់កងទ័ពរំដោះប្រជាជនចិន បាននិយាយនៅក្នុងសេចក្តីថ្លែងការណ៍មួយថា សកម្មភាពរបស់កាណាដា "បានបង្កបញ្ហាដោយចេតនា" និងធ្វើឱ្យខូចដល់សន្តិភាព និងស្ថិរភាពនៅក្នុងច្រកសមុទ្រ។ យោធាបន្ថែមថា "កងកម្លាំងខ្លួនរក្សាកម្រិតខ្ពស់នៃការប្រុងប្រយ័ត្នគ្រប់ពេលវេលា និងយ៉ាងម៉ឺងម៉ាត់ប្រឆាំងនឹងការគំរាមកំហែង និងការបង្កហេតុទាំងអស់"។

គួររម្លឹកថា កាលពីខែតុលាឆ្នាំមុន នាវាចម្បាំងរបស់អាមេរិក និងកាណាដា បានធ្វើដំណើររួមគ្នាឆ្លងកាត់ច្រកសមុទ្រ តិចជាងមួយសប្តាហ៍បន្ទាប់ពីប្រទេសចិន បានធ្វើហ្គេមសង្រ្គាមជុំថ្មីមួយនៅជុំវិញកោះនេះ៕