សន្និសីទសន្តិសុខនៅទីក្រុង Munich ប្រទេសអាល្លឺម៉ង់ លើកទី៦១ បានបញ្ចប់កាលពីថ្ងៃអាទិត្យ ក្នុងពេលទំនាក់ទំនងអន្តរអាត្លង់ទិកមានភាពតានតឹង។ លោក Christoph Heusgen ប្រធានសន្និសីទសន្តិសុខនៅទីក្រុង Munich បាននិយាយកាលពីថ្ងៃអាទិត្យដោយចង្អុលទៅរកការខ្វែងគំនិតគ្នាកាន់តែខ្លាំងឡើងរវាងអឺរ៉ុប និងសហរដ្ឋអាមេរិក ខណៈលោក បានបិទព្រឹត្តិការណ៍ប្រចាំឆ្នាំរយៈពេលបីថ្ងៃនេះថា «យើងត្រូវព្រួយបារម្ភថា មូលដ្ឋានតម្លៃរួមរបស់យើង មិនមែនជារឿងធម្មតាទៀតទេ»។

បន្ទាប់ពីសុន្ទរកថាដ៏ចម្រូងចម្រាសរបស់អនុប្រធានាធិបតីសហរដ្ឋអាមេរិក លោក J.D. Vance នៅក្នុងសន្និសីទ លោក Heusgen បានអរគុណអ្នកនយោបាយអឺរ៉ុប ដែល «បានបញ្ចេញមតិ និងបញ្ជាក់ឡើងវិញនូវតម្លៃ និងគោលការណ៍ពួកគេកំពុងការពារ»។

ក្នុងអំឡុងកិច្ចប្រជុំឆ្នាំនេះ អ្នកចូលរួម រួមមានប្រមុខរដ្ឋនិងរដ្ឋាភិបាលប្រមាណ៦០រូប និងរដ្ឋមន្ត្រីចំនួន ១៥០រូប បានពិភាក្សាអំពីបញ្ហាប្រឈមសន្តិសុខពិភពលោកសំខាន់ៗ ដូចជាបម្រែបម្រួលអាកាសធាតុ សន្តិសុខអឺរ៉ុប និងជម្លោះក្នុងតំបន់។

ទោះជាយ៉ាងណា ការខ្វែងគំនិតគ្នានៅតែបន្តកើតមានលើបញ្ហាដូចជាជម្លោះនៅអ៊ុយក្រែន និងការការពារអឺរ៉ុប ក្នុងពេលមានទិដ្ឋភាពភូមិសាស្ត្រនយោបាយកាន់តែស្មុគស្មាញ។ 

លោក Heusgen បានសង្កត់ធ្ងន់លើតម្រូវការបន្ទាន់សម្រាប់បទដ្ឋាន និងគោលការណ៍រួមនៅក្នុងពិភពលោកពហុប៉ូល។ លោកបាននិយាយថា «សណ្តាប់ធ្នាប់នេះងាយនឹងរំខាន និងបំផ្លាញ ប៉ុន្តែកាន់តែពិបាកក្នុងការកសាងឡើងវិញ»។