អ្នកនាំពាក្យក្រសួងការបរទេសអ៊ីរ៉ង់ លោក Esmaeil Baghaei កាលពីថ្ងៃអាទិត្យ បានច្រានចោលទាំងស្រុង នូវការចោទប្រកាន់ «គ្មានមូលដ្ឋាន និងគ្មានការទទួលខុសត្រូវ» នាពេលថ្មីៗនេះ ដោយក្រុមប្រទេស G7 ប្រឆាំងនឹងអ៊ីរ៉ង់។

កាលពីថ្ងៃសៅរ៍ រដ្ឋមន្ត្រីការបរទេស G7 និងតំណាងជាន់ខ្ពស់របស់សហភាពអឺរ៉ុប បានចេញសេចក្តីថ្លែងការណ៍មួយ បន្ទាប់ពីកិច្ចប្រជុំដែលបានធ្វើឡើង នៅក្រៅវេទិកានៃសន្និសិទសន្តិសុខទីក្រុង Munich ដែលក្នុងនោះ ពួកគេ បានចោទប្រកាន់អ៊ីរ៉ង់ថា បានអនុវត្ត «សកម្មភាពអស្ថិរភាព រួមទាំងការរីកចំរើនយ៉ាងឆាប់រហ័សនៃការចម្រាញ់សារធាតុអ៊ុយរ៉ានីញ៉ូមដោយគ្មានហេតុផលស៊ីវិលគួរឲ្យទុកចិត្ត ការជួយដល់អង្គការភេរវកម្មនានា និងក្រុមប្រដាប់អាវុធនៅទូទាំងមជ្ឈឹមបូព៌ា និងសមុទ្រក្រហម និងការរំលោភសិទ្ធិមនុស្សជាមូលដ្ឋាន»។

ពួកគេ ក៏បានថ្កោលទោសចំពោះ«ការរីកសាយភាយនៃមីស៊ីលបាលីស្ទីក និងយានដ្រូន» របស់អ៊ីរ៉ង់ នៅក្នុងសេចក្តីថ្លែងការណ៍។

លោក Baghaei បាននិយាយនៅក្នុងសេចក្តីថ្លែងការណ៍មួយថា ជំនួយផ្នែកអាវុធ និងហិរញ្ញវត្ថុរបស់ប្រទេស G7 សម្រាប់អ៊ីស្រាអែល និងការជ្រៀតជ្រែកផ្នែកយោធា និងនយោបាយរបស់ពួកគេ នៅក្នុងតំបន់អាស៊ីខាងលិច គឺជាសកម្មភាព «បង្កអស្ថិរភាព» ពិតប្រាកដ នៅក្នុងតំបន់ ដោយជំរុញឲ្យប្រទេសទាំងនោះបញ្ឈប់គោលនយោបាយ «ជ្រៀតជ្រែក» របស់ពួកគេ ដើម្បីស្ដារស្ថិរភាព និងសន្តិសុខក្នុងតំបន់។

លោក Baghaei បានបញ្ជាក់ថា រដ្ឋាភិបាលអ៊ីរ៉ង់មាន «សិទ្ធិ និងការទទួលខុសត្រូវស្របច្បាប់» ដើម្បីការពារប្រជាជនអ៊ីរ៉ង់ បូរណភាពទឹកដី និងអធិបតេយ្យភាពជាតិ ប្រឆាំងនឹងការគំរាមកំហែង និងការឈ្លានពានណាមួយ ដោយសង្កត់ធ្ងន់ថា ការពង្រីកសមត្ថភាពយោធា និងការការពាររបស់អ៊ីរ៉ង់ ដោយផ្អែកលើច្បាប់ និងបទប្បញ្ញត្តិអន្តរជាតិ គឺចាំបាច់សម្រាប់ធ្វើឲ្យសកម្មភាពទាំងនោះត្រូវបញ្ចប់ ព្រមទាំងសន្តិភាព និងសន្តិសុខ នៅក្នុងតំបន់អាស៊ីខាងលិចផងដែរ។