រដ្ឋមន្ត្រីការបរទេសអាមេរិក លោក Marco Rubio កាលពីថ្ងៃអាទិត្យ (ទី១៦ ខែកុម្ភៈ) បានបដិសេធការរំពឹងទុក អំពីការមាននូវការទម្លាយភាពទាល់ច្រកណាមួយ នៅក្នុងកិច្ចពិភាក្សា នាពេលខាងមុខ ជាមួយមន្ត្រីរុស្ស៊ី ស្តីពីការបញ្ចប់សង្គ្រាម នៅប្រទេសអ៊ុយក្រែន។

គួរបញ្ជាក់ថា ប្រធានាធិបតីអាមេរិក លោក Donald Trump បានទទូចម្តងហើយម្តងទៀតថា លោកនឹងបញ្ចប់ជម្លោះ ត្រឹមមួយថ្ងៃ ប្រសិនបើលោកត្រលប់ទៅកាន់សេតវិមានវិញ ប៉ុន្តែលោក Rubio បានសង្កត់ធ្ងន់ថា វានឹង «មិនងាយស្រួលនោះទេ» ក្នុងការដោះស្រាយជម្លោះដ៏រ៉ាំរ៉ៃ បង្ហូរឈាម និងស្មុគស្មាញបែបនេះ។

អំឡុងពេលផ្ដល់បទសម្ភាសន៍ជាមួយបណ្តាញសារព័ត៌មាន CBS នៅខាងក្រៅសន្និសីទសន្តិសុខទីក្រុង Munich ប្រទេសអាល្លឺម៉ង់ លោកបានប្រាប់ថា៖ «ដំណើរការឆ្ពោះទៅរកសន្តិភាពមិនមែនជាការប្រជុំតែ ១លើកនោះទេ»។

លោក Rubio គ្រោងនឹងដឹកនាំក្រុមមន្ត្រីជាន់ខ្ពស់របស់សហរដ្ឋអាមេរិក សម្រាប់ការពិភាក្សាជាមួយមន្ត្រីរុស្ស៊ី ក្នុងរដ្ឋធានី Riyadh (រីយ៉ាដ) ប្រទេសអារ៉ាប៊ីសាអ៊ូឌីត នៅប៉ុន្មានថ្ងៃខាងមុខនេះ។ គេនៅតែមិនទាន់ច្បាស់ទេថា តើនឹងមានការចូលរួមពីអ៊ុយក្រែនដែរ ឬយ៉ាងណា ហើយលោក Rubio បាននិយាយថា លោកក៏មិនប្រាកដដែរថា ទីក្រុងមូស្គូនឹងបញ្ជូនមន្ត្រីរូបណាមកនោះទេ។

យ៉ាងណាក្ដី លោកបានបញ្ជាក់ថា «មិនទាន់មានអ្វីត្រូវបានបញ្ចប់នៅឡើយទេ» ដោយលោកបានបន្ថែមថា គោលបំណង គឺដើម្បីស្វែងរកការបើកផ្លូវឲ្យមានការសន្ទនាដ៏ទូលំទូលាយមួយដែល «នឹងរួមបញ្ចូលប្រទេសអ៊ុយក្រែន ហើយនឹងពាក់ព័ន្ធនឹងការបញ្ចប់ជម្លោះនេះ»។

គួរដឹងដែរថា គម្រោងពិភាក្សានេះ កើតមានឡើងប៉ុន្មានថ្ងៃបន្ទាប់ពីលោក Trump និងប្រធានាធិបតីរុស្ស៊ីលោក Vladimir Putin បានជជែកគ្នាតាមទូរសព្ទដ៏យូរ ជាពេលដែលមេដឹកនាំទាំង២ បានយល់ព្រមចាប់ផ្តើមការចរចាបទឈប់បាញ់ភ្លាមៗ៕